BYD Yaponiyada o‘tayotgan Japan Mobility Show 2025 ko‘rgazmasida o‘zining yangi BYD T35 elektr yuk mashinasini namoyish etdi. Bu haqda CarNewsChina xabar bermoqda. Modelning boshlang‘ich narxi esa 8 mln iyena (taxminan $52,5 ming) atrofida bo‘ladi.
Texnik xususiyatlari
BYD T35 ikki xil kuzov turida taqdim etiladi — alyuminiy furgon va ochiq platformali (flatbed) versiyalar. Model LFP (lityiy temir fosfat) Blade Battery texnologiyasiga asoslangan bo‘lib, Cell-to-Chassis (CTC) dizayniga ega. Bu yechim batareyani avtomobil shassisiga bevosita integratsiya qilib, barqarorlik va xavfsizlikni oshiradi.
Bir marta to‘liq zaryad bilan T35 WLTC sikli bo‘yicha 250 km masofani bosib o‘tadi. Orqa o‘rnatilgan elektromotor 150 kVt (201 ot kuchi) quvvat va 340 N/m moment ishlab chiqaradi. Model ADAS xavfsizlik tizimlari — Forward Collision Warning (FCW), Adaptive Cruise Control (ACC) va Lane Departure Warning (LDW) funksiyalari bilan jihozlangan.
Salon va texnologiyalar
Kabina zamonaviy va qulay: 12,8 dyuymli sensorli ekran, ovoz bilan boshqarish tizimi, isitiladigan va shamollatiladigan haydovchi o‘rindig‘i, shuningdek simsiz telefon quvvatlash funksiyasi mavjud. Avtomobil OTA (Over-the-Air) yangilanishlarini qo‘llab-quvvatlaydi, bu esa dasturiy ta’minotni masofadan avtomatik yangilash imkonini beradi.
Eslatib o‘tamiz, Kursiv Uzbekistan nashri BYD Racco elektromobili taqdim etilgani haqida yozgan edi.
