Kuz kechalarida biroz mazasi bo‘lmayotgan yoki ko‘ngli nimani xohlayotganini bilmaydiganlar uchun qaynatma sho‘rva eng yaxshi tanlovlardan biri. Taomdagi qaynatma nomi barcha masalliqlar birgalikda sekin olovda uzoq vaqt davomida qaynatilishi sabab shunday atalgan. Natijada esa go‘sht yumshoq, sabzavotlar esa mazali va xushbo‘y bo‘ladi. Kursiv Uzbekistan bugungi kechki ovqatga kuz va qish mavsumida organizmni isitib, immunitetni mustahkamlaydigan ushbu sho‘rvani tayyorlashda yordamlashadi.
| Masalliqlar (4-5 kishi uchun) | Miqdori |
|---|---|
| Mol go‘shti (yoki qo‘y go‘shti) | 500 g |
| Kartoshka | 4 dona |
| Sabzi | 2 dona |
| Piyoz | 2 dona |
| Pomidor (yoki tomat pastasi) | 2 dona yoki 1 osh qoshiq |
| Sarimsoq | 3–4 bo‘lak |
| Tuz | ta’bga ko‘ra |
| Qora murch, zira | ta’bga ko‘ra |
| Bulg‘or qalampiri | ta’bga ko‘ra, har xil rangidan |
| Suv | 2–2,5 litr |
| Yashil ko‘katlar (petrushka, ukrop) | bezash uchun |
Tayyorlash bosqichlari: go‘shtni qaynatish
Go‘shtni yaxshilab yuvib, o‘rtacha kattalikda bo‘laklarga bo‘ling. So‘ng qaynab turgan suvga solib, ustidagi ko‘pigini olib tashlang. Keyin past olovda bir yoki bir yarim soat davomida qaynatiladi — shu jarayonda go‘sht yumshaydi va sho‘rvaning asosi pishadi.
Sabzavotlarni tozalash va to‘g‘rash
Kartoshka, sabzi va piyozni tozalang. Sabzini uzuncha, kartoshkani yirik bo‘laklarda, piyozni esa yarim halqa shaklida to‘g‘rang.
Sabzavotlar va ziravorlarni qo‘shish
Go‘sht pishib yumshagach, unga sabzavotlar qo‘shiladi. Sabzi, piyoz, kartoshka va sarimsoq (butunligicha) solinadi. Shuningdek, bo‘laklarga bo‘lingan pomidor (yoki tomat pastasi) va bulg‘or qalampiri ham qo‘shiladi. Bu bosqichda taomning asosiy hidi va ta’mi shakllana boshlaydi. Sho‘rvaga ta’bga ko‘ra lavr yaprog‘i, zira, kashnich urug‘i, tuz va ozgina qora murch solish mumkin.
Qaynatish
Barcha masalliqlar solingach, sho‘rva yana past olovda 30–40 daqiqa davomida qaynatiladi. Sabzavotlar yumshab, go‘sht suyakdan osongina ajrala boshlaganda taom tayyor bo‘ladi. Sho‘rva tayyor bo‘lgach, uni tatib ko‘rish kerak — agar kerak bo‘lsa, biroz tuz yoki murch qo‘shish mumkin.
Bezatish va dasturxonga tortish
Sho‘rvani idishlarga solib, ustidan mayda to‘g‘ralgan ko‘katlar bilan bezang. Taomni non bilan birga iste’mol qilish tavsiya etiladi.
Avvalroq Kursiv Uzbekistan italyancha spagettining tayyorlanish jarayoni haqida ma’lumot bergandi.
