BYD kompaniyasi tomonidan BYD M9 2026 avtomobili 4-noyabr kuni Xitoyda taqdim etiladi. Bu haqda CarNewsChina xabar bermoqda.
Yangilangan avtomobil tashqi ko‘rinishini asosan saqlab qolgan. LiDAR tizimi va 218 kilometrgacha elektrda yurish imkoniyati bilan jihozlangan. Bu M9 seriyasidagi eng yuqori natija hisoblanadi.
BYD M9 kompaniyaning eng yirik gibrid mikroavtobusi bo‘lib, Denza D9 va kichikroq oilaviy MPV modellari o‘rtasida joylashadi. U shaxsiy va korporativ mijozlar uchun mo‘ljallangan. Mazkur model yil boshida Meksikada ham M9 nomi ostida savdoga chiqarilgan edi.
Tashqi dizayn BYD’ning Loong Face (Dragon Face) uslubida yaratilgan. Keng xromli panjara va o‘tkir LED chiroqlar bilan. 2026-yilgi versiyada yangi Far Mountain Green rangi paydo bo‘lgan. O‘lchamlari o‘zgarishsiz qolgan. Uning uzunligi 5145 mm, eni 1970 mm, balandligi 1805 mm, g‘ildiraklar bazasi 3045 mmni tashkil etadi.
Asosiy yangiliklardan biri – tom qismida joylashgan LiDAR sensori. U yangi DiPilot B aqlli boshqaruv tizimini qo‘llab-quvvatlaydi. Bu avvalgi 2025-yilgi «C» versiyasida ishlatilgan uch kamerali tizim o‘rnini bosadi va yarim avtonom boshqaruv imkoniyatlarini kengaytiradi.
Salon Xitoy arxitekturasidan ilhomlangan «Four Waters Return to the Hall» dizayn konsepsiyasi asosida ishlab chiqilgan. Ichkarida suzuvchi sensorli ekran, pastki qismi tekis rul va ustuncha tipidagi uzatmalar tutqichi joylashgan.
Texnik jihatdan BYD M9 DM-i gibrid tizimi asosida ishlaydi. 1,5 litrli turbo dvigatel (115 kVt) va 200 kVt quvvatli elektromotor kombinatsiyasi bilan. Oldingi modellar 20,4 va 36,6 kVt·soatli LFP batareyalar bilan 100 km va 180 km elektr yurish masofasini ta’minlagan. Yangi 218 km versiyada esa kattaroq batareya o‘rnatilishi kutilmoqda.
Narxlar hozirgi diapazonga yaqin bo‘ladi. 249 800 – 309 800 yuan (taxminan $34,3 ming – $42,6 ming). Model Xitoyda Buick GL8 PHEV va SAIC Maxus MIFA 9 Super Hybrid kabi yirik gibrid MPV’lar bilan raqobatlashadi.
Eslatib o‘tamiz, Kursiv Uzbekistan nashri yangi BYD Racco elektromobilining saloni rasman ko‘rsatilgani haqida yozgan edi.
