Xonim — Markaziy Osiyo oshxonasining mashhur taomlaridan biri bo‘lib, bug‘da pishiriladigan juda yengil va shu bilan birga to‘yimli kechki ovqat varianti. Aksariyat hududlarda kuz-qish mavsumida ko‘proq tayyorlanadi, chunki issiq bug‘da pishgan xamir va go‘sht tanani yengil to‘yintiradi, hazm qilish jarayoni ham og‘ir bo‘lmaydi. Kursiv Uzbekistan bugun kechki ovqatga xonim tayyorlashda yordamlashadi.
| Masalliqlar (4-5 kishi uchun) | Miqdori |
|---|---|
| Mol yoki qo‘y qiymasi | 500 gr |
| Piyoz | 2 dona |
| Tuz | ta’bga ko‘ra |
| Qora murch, zira | ta’bga ko‘ra |
| Xamir uchun un | 450–500 gr |
| Suv | yetarli miqdor |
| O‘simlik yog‘i | 2 osh qoshiq (xamirga surish uchun) |
Tayyorlash bosqichlari: xamir qorish
Un elab olinadi va suv bilan qattiqroq xamir qoriladi. Xamir 20–25 daqiqa damga qo‘yiladi. So‘ng yupqa qilib yoyiladi (manti xamiriga o‘xshash).
Go‘shtli aralashma tayyorlash
Piyoz mayda to‘g‘raladi. Qiymaga qo‘shiladi va tuz, qora murch, zira (ta’bga ko‘ra) solinib yaxshilab aralashtiriladi.
Xamirga yog‘ surish va qiyma solish
Yoyilgan xamir yuziga juda yupqa qilib yog‘ suriladi. Ustiga go‘shtli aralashma tekis tarqatiladi. Xamir rulon shaklida o‘raladi. So‘ng mantiqasqonga solinadi va bug‘da taxminan 45 daqiqa pishiriladi. Taom o‘rtacha olovda pishishi kerak, shunda xamir ham, go‘sht ham bir maromda yumshoq chiqadi.
Bezash va dasturxonga tortish
Xonim pishib chiqqandan keyin bo‘laklarga bo‘linadi va issiq holda likopchaga chiqariladi. Ustiga ozgina qizil achchiq sous, tuz yoki maydalangan ko‘katlar sepilsa yanada mazali bo‘ladi. Yoniga qatiq bilan berish ham mumkin.
Avvalroq Kursiv Uzbekistan bulg‘or qalampirli do‘lmaning tayyorlanish jarayoni haqida ma’lumot bergandi.
