Xitoyning BYD kompaniyasi yangi avlod BYD Xia 2026 minivenini rasman taqdim etdi. Bu haqda ITHome xabar bermoqda.
Model Dynasty liniyasining flagman modeli hisoblanadi. Mashina to‘rtta komplektatsiyada taklif qilinmoqda. Elektr rejimida 100 yoki 218 km yo‘l bosish imkoniyatiga ega.
Bazaviy 100KM Progressive versiyasi 206,8 ming yuandan ($28,5 ming) boshlanadi. 100KM Superior — $30 ming, 218KM Superior — $34 ming, 218KM Premium esa $37 ming turadi.
Model Dragon Face dizayn uslubida yaratilgan. Model ikki yonlama suriluvchi eshiklar, bitta chiziqli orqa optika va 7 xil kuzov rangi bilan jihozlangan. Yangi ranglar orasida binafsha-oltin, yashil va qora-oltin mavjud.
Ichki qismda 7,2 litrli mini sovutgich, 28 karnayli DiSound audiosistemi va proyeksiya ekrani mavjud.
BYD avtomobil va uy o‘rtasida ekotizim yaratmoqda:
- Midea bilan hamkorlikda mashina, uy va foydalanuvchi o‘rtasida ovozli boshqaruv tizimi yaratilgan;
- Goodbaby bilan bolalar va uy hayvonlari uchun aqlli o‘rindiqlar ishlab chiqilgan;
- Breo — bo‘yin va ko‘z uchun massaj moslamalari;
- Insta360 — avtomobil ichidan video olish imkonini beruvchi kamera integratsiyasi.
Xia 2026 1,5 litrli turbo dvigatel (156 ot kuchi) va 272 ot kuchiga ega elektromotor bilan ishlaydi. Transmissiya — e-CVT. Gibrid tizim bilan umumiy yo‘l bosish masofasi 1163 km, batareya to‘liq tugaganda yoqilg‘i sarfi atigi 4,9 l/100 km.
Standart jihozlarga 10 ta xavfsizlik yostiqchasi kiradi, jumladan 3,2 metrlik yon pardalar va markaziy yostiqcha. Shuningdek, anti-bosh aylanish tizimi, yo‘l notekisliklarini oldindan aniqlovchi Yunlian-C osma tizimi va 140 km/soat tezlikda ham barqarorlikni saqlaydigan TBC tormoz tizimi o‘rnatilgan.
Eslatib o‘tamiz, Kursiv Uzbekistan BYD M9 2026 avtomobili haqida nimalar ma’lumligi haqida yozgan edi.
