Exeed brendi yangi Chery Exlantix ET5 krossoveri uchun oldindan buyurtma qabul qilishni 13-noyabrdan boshlashini ma’lum qildi. Bu haqda CarNewsChina xabar bermoqda.
Model shu oy oxirida bo‘lib o‘tadigan Guanchjou avtosalonida jamoatchilikka taqdim etiladi. Exlantix ET5 dunyoda birinchi bo‘lib Horizon Robotics’ning HSD va Journey 6P aqlli haydash platformasi bilan jihozlangan seriyali avtomobil bo‘ladi. Dizayni Yevropadagi sport avtomobil studiyalari va Exeed dizaynerlari hamkorligida ishlab chiqilgan.
Modelning uzunligi 4 780 mm, g‘ildirak bazasi esa 2 800 mm bo‘lib, u o‘rta sinf SUV segmentiga kiradi. Old qism yopiq panjara, chig‘anoq shaklidagi faralar va uch pog‘onali yoritgich bilan ajralib turadi.
Paneldagi uch ekranli maketda 10,25 dyuymli asboblar paneli, 15,6 dyuymli markaziy ekran va 12,3 dyuymli yo‘lovchi displeyi mavjud. Multimediyani Snapdragon 8255 protsessori boshqaradi.
Model sun’iy intellekt bo‘yicha iFlytek va DeepSeek bilan birgalikda ishlab chiqilgan ovozli boshqaruv tizimi bilan ta’minlangan. Shuningdek, 21 karnayli Boyah Sound audio tizimi, panoramali lyuk, ko‘p funksiyali rul, atmosfera yoritgichi, ventilyasiya, isitish va massaj funksiyasiga ega old o‘rindiqlar taklif etiladi.
Quvvat tizimi:
- 1,5T benzinli dvigatel (range-extender, 115 kVt);
- 195 kVt (324 Nm) momentga ega orqa elektr motor;
- 32,66 kVt·soat LFP batareya;
- 205 km sof elektr masofasi;
- 1 300 km dan ortiq umumiy masofa.
Exeed Exlantix ET5 Xitoyda BYD Song L DM-i, Sealion 06 DM-i va Leapmotor C11 kabi o‘rta sinf EREV SUV modellariga raqobatchi bo‘ladi. Narxlar 13-noyabrda oldindan sotuv boshlanishida e’lon qilinadi.
Eslatib o‘tamiz, Kursiv Uzbekistan Chery Jetour Shanhai T1AWD avtomobili taqdim etilgani haqida yozgan edi.
