GM Yaqin Sharq mamlakatlarida yangilangan 2026-yilgi Chevrolet Groove modelining rasmiy savdosini boshlaganini e’lon qildi. Bu haqda GMAutority xabar bermoqda.
Model iyul oyida taqdim etilganidan to‘rt oy o‘tib bozorlarga chiqdi. Yangi Groove endilikda BAA, Saudiya Arabistoni, Ummon, Bahrayn, Qatar, Quvayt, Livan va Iordaniya bozorlarida sotuvga qo‘yildi.
U Chevrolet brendining eng arzon krossoveri sifatida namoyon bo‘lgan. Texnik imkoniyatlari, xavfsizlik tizimi va qulaylik darajasi sezilarli darajada yaxshilangan.
GM Yaqin Sharq vakolatxonasining ma’lum qilishicha, yangi Groove birinchi marta avtomobil sotib olayotgan xaridorlar, yosh mutaxassislar va oila a’zolari soni ortayotgan haydovchilar ehtiyojlariga moslashtirilgan. Model yangi dizayn, LT va RS komplektatsiyalari, shuningdek, qulaylik va xavfsizlikka ko‘proq e’tibor bilan ishlab chiqilgan.
Har ikkala versiyada ham 10,25 dyuymli sensorli multimedia ekrani mavjud. Parkovka datchiklari, orqa kamera va bir nechta xavfsizlik yostiqchalari standart tarzda o‘rnatilgan. RS komplektatsiyasi esa Chevy Safety Assist deb nomlangan ilg‘or haydovchiga yordam tizimlari to‘plami bilan ajralib turadi.
Texnik jihatdan yangi Groove’ning barcha variantlari 1,5 litrli turbo dvigatel (149 ot kuchi, 188 Nm moment) bilan jihozlangan. Avtomatik CVT uzatmalar qutisi orqali old g‘ildirakdan tortish tizimida ishlaydi. Model Xitoyda SAIC-GM-Wuling qo‘shma korxonasi tomonidan ishlab chiqilgan.
Yangi 2026 Chevy Groove Yaqin Sharqdagi Chevrolet dilerlik tarmoqlarida savdoga chiqarilgan. Bu model kompaniya assortimentidagi eng arzon avtomobil hisoblanadi. BAAda boshlang‘ich narx 64 ming dirhamni, ya’ni taxminan $17,5 mingni tashkil etadi.
Eslatib o‘tamiz, Kursiv Uzbekistan Chevrolet Tracker Midnight Edition avtomobili taqdim etilgani haqida yozgan edi.
