Tesla boshqaruv kengashi Ilon Maskga $878 mlrdgacha aksiyalar orqali kompensatsiya berish masalasini muhokama qilmoqda. Bu haqda Reuters agentligi ma’lum qildi.
Ta’kidlanishicha, bu qaror aksiyalar qiymatining pasayishiga sabab bo‘lishi mumkin hamda dunyoning eng boy shaxsiga an’anaviy korporativ boshqaruv qoidalari tatbiq etiladimi yoki yo‘qligini belgilovchi muhim masala hisoblanadi.
Boshqaruv kengashi va ko‘plab investorlar Mask faqat Tesla’ni sun’iy intellekt sohasida yetakchi kompaniyaga aylantirish va’dasini amalga oshira oladi deb hisoblaydi. Agar u o‘n yil ichida barcha maqsadlariga erishsa, Tesla’ning bozor qiymati $8,5 trlnga yetadi va Mask aksiyalarning chorak qismiga egalik qiladi. Bu boshqa hech bir bosh direktor olmagan darajada katta kompensatsiya sifatida baholanmoqda.
Boshqa yirik aksiyadorlar va boshqaruv to‘lov mutaxassislari esa bu taklif investorlar uchun katta xavf ekanligini ta’kidlaydi. Ularning fikricha, kompaniya kelajagi bir yetakchiga bog‘langanligi, manfaatlar to‘qnashuvi va nazoratsiz hokimiyat birlashishi boshqaruv qoidalariga ziddir. Mas’uliyatli boshqaruv esa raqobat bozoriga ochiq bo‘lishni taqozo etadi.
Muzokaralar davomida Mask boshqa loyihalariga – SpaceX, xAI va Neuralink kabi korxonalarga ustuvorlik berishi mumkinligini bildirgan. Shu sababli boshqaruv kengashi Maskni kompaniyada uzoq muddatli saqlash maqsadida aksiyalar berish shartlarini belgilagan.
Eslatib o‘tamiz, avvalroq Ilon Mask Neuralink bemori tez orada kuchaytirilgan chip olishi haqida ma’lum qilgan edi.
