Chery Exeed Exlantix ES 2026 elektromobili bo‘yicha batafsil ma’lumotlar Xitoyning Sanoat va axborot texnologiyalari vazirligi tomonidan e’lon qilindi. Bu haqda CarNewsChina xabar bermoqda.
Model 97,682 kVt/soat sig‘imli yirik akkumulyator bilan jihozlanadi. Konfiguratsiyaga qarab 835 yoki 860 km masofa taqdim etiladi. Sinov sharoitlari oshkor qilinmagan.
2025-yil may oyida taqdim etilgan hozirgi Exlantix ES 705–710 km CLTC masofasiga ega uchta komplektatsiyada sotilmoqda. Narxlar 189 800–269 800 yuan oralig‘ida ($26,6 ming–$37,9 ming).
Yangi model o‘zining o‘rta–yirik sedan o‘lchamlarini saqlab qolgan. Uzunligi 4945 mm, eni 1978 mm, balandligi 1480 mm (ba’zi versiyalarida 1467 mm), g‘ildirak bazasi esa 3000 mm. Tashqi ko‘rinishda yopiq panjara, ingichka LED optika, orqa LED chiziq va ba’zi trimlarda elektr spoyler mavjud. Standart 19 dyuymli disklar qo‘llanadi, 21 dyuymli variantlar esa 6 pistonli tormoz kallaklari bilan taklif etiladi.
Salon 8,2 dyuymli raqamli panel va 15,6 dyuymli 2.5K displey bilan jihozlangan. Avtomobilga Snapdragon 8295P chipi o‘rnatilgan. Lion AI yordamchisi, Huawei HiCar va Apple CarPlay tizimlarini qo‘llab-quvvatlaydi. Rul boshqaruvi sensorli tugmalar va qizdirish funksiyasiga ega.
Modelda ilg‘or haydovchiga yordam tizimlari katta e’tibor markazida. Max va Ultra versiyalarida tomda joylashgan LiDAR bor. 30 sensor va ikki dona NVIDIA DRIVE Orin X chipi mavjud. Tizimning umumiy hisoblash quvvati 508 TOPS bo‘lib, shahar va trassada yordamchi boshqaruvni, shuningdek, to‘liq avtomatlashtirilgan parkovkani ta’minlaydi.
Mavjud Exlantix ES’de bir va ikki motorli versiyalar bor. Yakka motor 230 kV quvvat bilan 77 kVt/soat LFP akkumulyatordan foydalanadi va 705 km CLTC masofasiga ega. Ikki motorli variant 353 kV quvvat beradi. 100 kVt/soatli litiy-ternar akkumulyator bilan 710 km masofa taqdim etadi. Yuqori komplektatsiyalar CDC elektromagnit amortizatsiya va IAS havo osmasi bilan keladi.
Eslatib o‘tamiz, Kursiv Uzbekistan nashri Chery iCaur V27 avtomobili qanday xususiyatlarga egalgi haqida yozgan edi.
