Wuling Binguo S avtomobili uchun 52,9 kWh quvvatga ega yangi batareya varianti tasdiqlandi. Bu haqda CarNewsChina xabar bermoqda.
CLTC bo‘yicha yurish masofasi 525 kmni tashkil etadi. Bu modelni MG4’ning bevosita raqibiga aylantiradi. Ma’lumot Xitoyning Sanoat va axborot texnologiyalari vazirligi reyestridan olingan. Rasmiy taqdimot sanasi hali aytilmagan.
Binguo S Xitoyda ixcham elektrokar sifatida taklif qilinadi. Uzunligi 4265 mm. Eni 1785 mm. Balandligi 1600 mm. G‘ildirak bazasi 2610 mm. Tashqi ko‘rinishda yopiq panjarali old qism, ko‘p qirrali faralar va «C» shaklli kunduzgi chiroqlar, orqada esa to‘liq uzunlikdagi LED chiziq mavjud.
Salon 8,88 dyuymli raqamli panel va 12,8 dyuymli markaziy ekran bilan jihozlangan. Uch ilgakli rul, shift-by-wire uzatma kaliti va 50 Vt simsiz quvvatlash bor. Ichki ranglar Soft White yoki Warm Brown. Bazaviy jihozlar qatorida shinalar bosimi nazorati, orqa kamera, kruiz nazorat, Bluetooth kalit va 6 karnayli audio tizim bor. Yuqori komplektlar panoramali kamera, elektr haydovchi o‘rindig‘i, isitiluvchi old o‘rindiqlar va bukiluvchi elektr oynalarni qo‘shadi.
Hozirda model 31,9 kWh (325 km) va 41,9 kWh (430 km) batareyalar bilan sotiladi. Ikkalasi ham 75 kVt quvvatli, 180 Nm momentli old elektr motor bilan jihozlangan. Batareyalar LFP turida. Tez zaryadlashda 30 foizdan 80 foizgacha 35 daqiqada yetadi. Xavfsizlik tizimlari to‘rt havo yostig‘i, ESC va ko‘tarilishda yordam tizimini o‘z ichiga oladi.
Narxlar 66 800–79 800 yuan oralig‘ida. Bu taxminan $9 ming–$11,3 ming dollar. Yangi 525 km versiyaning to‘liq konfiguratsiyasi va sotuv sanasi keyin e’lon qilinadi. Bu narxga O‘zbekistonda deyarli Chevrolet Damas avtomobilini (Avtmobilning narxi 93 mln so‘mdan boshlanadi. Markaziy bank belgilagan 10-noyabr kungi kurs bo‘yicha $7,8 ming.) xarid qilish mumkin. Ammo bojxona to‘lovlari va boshqa xarajatlar bilan modelni mahalliy bozorga olib kelish qimmatga tushishi mumkin.
Eslatib o‘tamiz, Kursiv Uzbekistan nashri Wuling Starlight 560 avtomobili haqida nimalar ma’lumligi haqida yozgan edi.
