Shu yilning to‘qqiz oyi yakunlariga ko‘ra, UzAuto Motors 2,7 trillion so‘m miqdorida sof foyda ko‘rdi. Bu ko‘rsatkich o‘tgan yilning shu davriga nisbatan 3,6 foizga kam. Shu bilan birga, kompaniyaning sof tushumi 12,8 foizga kamayib, 35,4 trillion so‘mni tashkil etdi.Bu haqda Korporativ axborot yagona portalida kompaniyaning moliyaviy hisobotlari e’lon qilindi.
Mahsulot tannarxi ham mos ravishda kamayib, 29,2 trillion so‘mga teng bo‘ldi. Ammo asosiy faoliyatdan olingan foyda (operatsion foyda) keskinroq 2,3 trillion so‘mgacha (-32%) tushdi. Bunga kompaniyaning ma’muriy va tijoriy xarajatlari 13 foizga oshib, 4,3 trillion so‘mga yetgani sabab bo‘ldi.
Shunga qaramay, UzAuto Motors umumiy moliyaviy natijalarini foizli daromadlar va valyuta kursi farqlaridan olingan foyda hisobiga yaxshiladi. Kompaniyaning moliyaviy bloki 956,6 milliard so‘m foyda keltirdi, bu o‘tgan yilgi 121,6 milliard so‘mlik natijadan sakkiz barobar ko‘pdir. Jumladan, 785 milliard so‘m valyuta kursi foydasi va 841 milliard so‘m foiz daromadi qayd etilgan.
Natijada kompaniyaning sof rentabellik darajasi 6,8 foizdan 7,5 foizga oshdi. Bu o‘sish moliyaviy daromadlarning ijobiy ta’sirini aks ettirib, daromadning kamayishi va operatsion foydaning pasayishini qoplash imkonini berdi.
Avtomobil ishlab chiqarish hajmi
Avtomobil ishlab chiqarish hajmlari esa kamaygan. 2025-yilning to‘qqiz oyi davomida UzAuto Motors eng ommabop modellar ishlab chiqarishini qisqartirdi, bu esa daromad pasayishiga olib kelgan.
- Cobalt — 116 ming dona (-1,4%);
- Damas — 67,9 ming dona (-3,1%);
- Onix — 22,6 ming dona (-8,7%).
Shu bilan birga, ayrim modellar bo‘yicha o‘sish kuzatildi. Masalan, Tracker ishlab chiqarish hajmi 31,2 ming donadan 34,2 mingtaga (+9,6%) oshdi va bu boshqa modellar bo‘yicha kamayishni qisman qoplagan.
Avvalroq Kursiv Uzbekistan UzAuto Motors bir yil ichida uchinchi marta dividend toʻlashi mumkinligi haqida yozgandi.
