Qozog‘istonda jami 293 million kub metrdan ortiq radioaktiv chiqindi saqlanayotgani ma’lum qilindi. Bu haqda Atom energiyasi agentligi raisi o‘rinbosari Gumar Sergazin parlament quyi palatasi majlisdagi muhokama chog‘ida ma’lum qildi, deb xabar bermoqda Tengrinews.kz.
Uning so‘zlariga ko‘ra, chiqindilarning asosiy qismi 290 million kub metri past darajadagi radioaktiv materiallardan iborat bo‘lib, ular asosan Semipalatinsk yadroviy poligoni hududida to‘plangan. Bu yerda yillar davomida ifloslangan tuproq yig‘ilib, maxsus joylarda saqlanmoqda.
Qolgan qismi esa o‘rta va yuqori darajadagi radioaktiv chiqindilar bo‘lib, ular Milliy yadro markazi, Yadro fizikasi instituti, Ulba metallurgiya zavodi hamda Stepnogorsk kon-kimyo kombinati kabi yirik korxonalardan chiqmoqda. Shuningdek, Oqtov shahridagi Qo‘chqoq-ota va Kimyo-gidrometallurgiya zavodi ham chiqindilarni saqlovchi obyektlar sirasiga kiradi.
Shuningdek, yig‘ilishda taqdim etilgan yangi «Radioaktiv chiqindilar bilan muomala qilish to‘g‘risida»gi qonun loyihasi bu boradagi yagona huquqiy tizimni yaratishni maqsad qilgan. Hujjatga ko‘ra, chiqindilarni saqlash, tashish yoki qayta ishlash uchun korxonalar maxsus litsenziyaga ega bo‘lishi shart. Bu jarayonni Atom nazorati va nazorat qo‘mitasi nazorat qiladi.
«Dunyo miqyosida ham radioaktiv chiqindilarni ko‘mish tizimi yetarli darajada rivojlanmagan. Bizda esa bu jarayon hukumat qarori bilan belgilanadi va milliy operator xavfsizlik uchun mas’ul bo‘ladi», — dedi Sergazin.
Hujjatda xorijiy radioaktiv chiqindilarni Qozog‘iston hududiga olib kirish va ularni ko‘mish qat’iyan taqiqlanishi belgilangan.
Avvalroq Kursiv Uzbekistan Toshkentda chiqindi to‘lovini kechiktirgan olti ming abonentning elektr to‘loviga cheklov qo‘yilgani haqida yozgandi.
