O‘zbek taomlari orasida alohida o‘rin tutadigan dimlamani endi multivarka yordamida ham tayyorlash mumkin. Bu usul pazandalar uchun qulay bo‘lib, sabzavotlarning tabiiy sharbati va go‘shtning lazzatini to‘liq saqlab qoladi. Natijada taom juda yumshoq, mazali va foydali chiqadi.
Kursiv Uzbekistan bugun multivarkada dimlama tayyorlashni o‘rgatadi.
Masalliqlar jadvali
| Masalliqlar nomi | Miqdori |
|---|---|
| Mol go‘shti | 500 gramm |
| Piyoz | 2 dona |
| Qizil sabzi | 1–2 dona |
| Pomidor | 2 dona |
| Qizil bulg‘or qalampiri | 1 dona |
| Qovoqcha | 1 dona |
| Bryussel karami | 300 gramm |
| Sarimsoqpiyoz | 1 bosh |
| Shivit (ukrop) | 1 bog‘ |
| Karam bargi | 5–6 dona |
| O‘simlik yog‘i | 30 millilitr |
| Tuz va murch | Ta’bga ko‘ra |
Tayyorlanish bosqichlari
- Piyozni joylash: Multivarkaga yog‘ soling va halqasimon to‘g‘ralgan piyozning yarmini pastga tering.
- Go‘shtni qo‘shish: O‘rtacha kattalikda to‘g‘ralgan mol go‘shtini piyoz ustiga joylashtiring.
- Qolgan piyozni solish: Go‘sht ustidan qolgan piyozni tering.
- Sabzi bo‘laklarini joylashtirish: Aylana shaklda to‘g‘ralgan sabzini ustiga tering.
- Bulg‘or qalampiri va pomidor: Aylana shaklda to‘g‘ralgan bulg‘or qalampiri va pomidorni ustidan tering. Sarimsoqpiyozni butunligicha qo‘shing.
- Qovoqcha va ziravorlar: Qovoqchani aylana shaklda kesib qo‘shing, ustidan tuz va murch seping.
- Karam va ko‘katlar: Bryussel karamini, to‘g‘ralgan shivitni soling, ustini karam barglari bilan yoping.
- Pishirish: Multivarka qopqog‘ini yoping. Avval «qovurish» rejimida 40 daqiqa pishiring, so‘ng «dimlash» rejimiga o‘ting va 90 daqiqa davomida pishiring.
Dimlama tayyor bo‘lgach, uni suzib, issiqligida dasturxonga torting. Sabzavotlar sharbati va go‘shtning lazzati uyg‘unlashgan bu taom har bir pazanda dasturxoniga iliqlik bag‘ishlaydi. Yoqimli ishtaha!
