Venesuela prezidenti Nikolas Maduro Karakasdagi mitingda AQSh xalqi Venesuela bilan birlashib, Amerikalar tinchligi uchun harakat qilishi kerakligini aytdi. Bu haqda CNN agentligi ma’lum qildi.
«Amerikalar tinchligi uchun birlashish kerak. Endi cheksiz urushlar bo‘lmasin. Adolatsiz qirg‘inlar bo‘lmasin. Liviya va Afg‘oniston kabi vaziyatlar takrorlanmasin», — deya AQShni uzoq davom etadigan mojaro boshlashdan tiyilishga chaqirdi u.
So‘nggi haftalarda AQSh Karib dengizida harbiy kuchlarini kuchaytirib, kamida 19 ta zarba hujumi bilan 76 kishini o‘ldirdi, deb xabar qilinmoqda. AQSh bu harakatlarini narkotik tashuvchilarga qarshi qilinganini bildirgan bo‘lsa-da, Maduro ularni tabiiy resurslarni qo‘lga kiritish va «marionetka hukumati» o‘rnatish uchun urinish deb hisoblaydi.
Venesuela BMT Xavfsizlik Kengashidan AQSh bilan bog‘liq vaziyatga aralashishni so‘ragan. 12-noyabrda Karib dengiziga AQShning eng yirik aviakreyseri USS Gerald R. Ford kirib, boshqa sakkiz harbiy kemaga qo‘shildi. 14-noyabrda AQSh Mudofaa vaziri Pit Hegset «Southern Spear» operatsiyasini e’lon qilib, uning maqsadi AQSh xavfsizligini ta’minlash va narkoterror tahdidini bartaraf etish ekanini bildirdi.
Venesuela esa harbiy va fuqarolardan iborat militsiya kuchlarini safarbar qilgan, mashqlar o‘tkazib, tahdidlarga tayyorlanmoqda. Shuningdek, Karakasga olib boruvchi asosiy yo‘lda tank bilan harbiy texnikalarni to‘sish uchun katta to‘siqlar o‘rnatilgan.
Ma’lumot uchun, Venesuela Qurolli Kuchlarida taxminan 123 ming harbiy bor. Maduroning aytishicha, ko‘ngilli militsiyalarda 8 mlndan ortiq zaxirachilar mavjud.
Eslatib o‘tamiz, avvalroq Venesuelada harbiy safarbarlik e’lon qilingan edi.
