Geely yangi Geely Galaxy 2026-yilgi Starship 7 EM-i modelini taqdim etdi. Bu haqda CarNewsChina nashri xabar bermoqda.
Yangilangan avtomobil to‘rt xil variantda chiqqan. Narxi 95 800 – 123 800 yuan orasida, ya’ni $13,4 – 17,3 ming. Modelning eng katta yangiliklaridan biri elektr yurish masofasining oshirilishi. Endi eng qimmat komplektatsiya 200 km CLTC toza elektr masofasini beradi. Kirish darajasidagi model esa 55 km o‘rniga 130 km masofani bosib o‘tadi. 135 km variant ham mavjud. Umumiy masofa 1575 km ga yetadi.
2026 Starship 7 EM-i GEA arxitekturasiga qurilgan. Kuzov o‘lchamlari o‘zgarmagan. Uzunligi 4740 mm, eni 1905 mm, balandligi 1685 mm, g‘ildirak bazasi 2755 mm. Aerodinamik ko‘rsatkich 0,288 Cd. Old qismi yopiq panjara, uzluksiz DRL chiroq chizig‘i va o‘tkir faralar bilan ishlangan.
Orqa qismda uzluksiz stop chiroq bor. Pastki qismda yashirin chiqarish tizimi joylashgan.
Salon Starship Grey rangida taqdim etildi. Unda 15,4 dyuymli Flyme Auto displeyi (avval 14,6 edi), 14 nuqtali massaj funksiyasiga ega o‘rindiqlar, 16 dinamikli Flyme Sound audio tizimi mavjud. Komfort uchun orqa o‘rindiqlar isitiladi, rul isitish tizimi bor. Old oynalar ikki qatlamli shovqinga qarshi ishlaydi.
Avvalroq Kursiv Uzbekistan 2026 Geely Starship 7 qanday imkoniyatlar bilan taqdim etilishi haqida yozgan edi.
