Ispaniya sudi Meta kompaniyasini raqobat qoidalarini buzgani va Yevropa Ittifoqining ma’lumotlarni himoya qilish reglamentiga rioya qilmagani uchun $552 million jarimaga tortdi. Bu haqda Reuters xabar bermoqda.
Madrid sudi qaroriga ko‘ra, kompensatsiya 87 ta raqamli nashr va axborot agentligiga yo‘naltiriladi. Jarima Meta kompaniyasining Facebook va Instagram platformalarida xulq-atvorga asoslangan reklama uchun shaxsiy ma’lumotlardan foydalanish usuli bilan bog‘liq.
Sudning ta’kidlashicha, AQSh texnologiya giganti foydalanuvchi ma’lumotlarini noqonuniy qayta ishlash orqali Ispaniya onlayn reklama bozorida sezilarli raqobat ustunligiga ega bo‘lgan. Da’vo 2018-yil may oyida kuchga kirgan ma’lumotlarni himoya qilish bo‘yicha umumiy reglament talablariga asoslangan.
Sudya Meta reklamadan kamida 5,3 milliard yevro daromad olganini va bu mablag‘ reglament qoidalarini buzgan holda topilganini taxmin qilmoqda. Meta vakillari hozircha vaziyatga izoh berishmadi. Qaror ustidan apellyatsiya shikoyati berilishi mumkin. Avvalroq Yevropa Komissiyasi ham Meta’ni raqobat qoidalarini buzgani uchun $840 million jarimaga tortgan edi.
Avvalroq Kursiv Uzbekistan Meta 2024-yilda soxta onlayn reklamalardan 16 mlrd dollar daromad olgani haqida xabar bergan edi.
