Xpeng kompaniyasi tomonidan 2025-yilgi Guangzhou avtosalonida Xpeng X9 EREV avtomobili rasman taqdim qilindi. Bu haqda CarNewsChina xabar bermoqda.
Yangi model 7 o‘rinli katta MPV bo‘lib, ikki xil komplektatsiyada sotuvga chiqdi. Narxlar 309 800 yuan ($43,4 ming) va 329 800 yuan ($46,2 ming) etib belgilangan.
Model Starship Universe deb nomlangan aqlli salon tizimi bilan jihozlangan. X9 EREV Xpeng‘ning Kunpeng Super EREV platformasiga qurilgan bo‘lib, 800V yuqori voltli arxitekturaga ega. Mashina 452 km toza elektr yurish masofasini beradi. Umumiy masofa 1602 km ga yetadi.
Old dizayn to‘liq yangilangan. Havo kirish panjarasi 30 foizga kattalashgan, ikki tomonida esa uch o‘lchamli sovitish kanallari joylashgan. Yoritgichlar to‘liq LED bo‘lib, uzluksiz DRL chizig‘i bilan ajralib turadi.
Kuzov uzunligi 5316 mm, eni 1988 mm, balandligi 1785 mm, g‘ildirak bazasi esa 3160 mm.
Salon katta ekranlar bilan boyitilgan. Markazda 17,3 dyuymli boshqaruv ekrani, haydovchi oldida 10,25 dyuymli panel bor. Qualcomm Snapdragon 8295P chipi ishlatilgan. Shuningdek, 21 dyuymli HUD tizimi lane-level navigatsiya va SR muhiti bilan integratsiyalangan.
Ikkinchi qator nol tortishish o‘rinchoqlari, yon tomonga o‘rnatilgan boshqaruv tugmalari va 21,4 dyuymli multimedia ekraniga ega.
Kapot ostida 1.5T DAM15NTE benzinli generator va 210 kW quvvatli elektromotor ishlaydi. Dvigatelning issiqlik samaradorligi 43,06 foizga teng. Batareya sig‘imi 63,3 kVt/soat, yoqilg‘i baki esa 60 litr. Sarf 6,4 L/100 km qilib ko‘rsatilgan.
5C tezkor zaryadlash 10 daqiqada 313 km elektr masofani qo‘shib beradi. 10 foizdan 80 foizgacha zaryadlash atigi 11,7 daqiqa davom etadi. Mashina 6 kW quvvatda tashqi qurilmalarga energiya berishi mumkin.
Eslatib o‘tamiz, Kursiv Uzbekistan nashri XPeng X9 Ultra avtomobili qanday chipda taqdim etilishi haqida yozgan edi.
