O‘zbekistonda hafta davomida qanday ob-havo bo‘ladi
O‘zbekiston hududida hafta davomida havo o‘zgaruvchan bo‘lib, deyarli barcha hududlarda yog‘ingarchilik kuzatilmaydi. Shamol asosan sharqdan esadi, ba’zi viloyatlarda tuman tushishi mumkin. Harorat kundan-kunga biroz pasayib boradi, ammo kunlik ko‘rsatkichlar hali ham iliq chegaralarda qolmoqda.
Qoraqalpog‘iston Respublikasi va Xorazm viloyati
Hududda havo barqaror va quruq bo‘ladi. 25-26 noyabr kunlari kechalari 0–5 daraja iliq, ayrim joylarda 2 daraja sovuq kuzatilishi mumkin. Kunduzgi harorat 12–17 daraja atrofida bo‘ladi. 27-28 noyabrda kechalari 3 daraja sovuq – 2 daraja iliq, kunduzlari esa 10–15 darajadan 8–13 darajagacha pasayadi.
Buxoro va Navoiy viloyatlari
Hafta davomida havo o‘zgaruvchan, yog‘ingarchilik kutilmaydi. Shamol sharqdan 7–12 m/s tezlikda esadi. 25 – 27 noyabr oralig‘ida kechalari 0–5 daraja iliq, kunduzlari 13–18 daraja bo‘ladi. 28 noyabrda esa kechalari 3 daraja sovuq – 2 daraja iliq, kunduzlari 10–15 daraja atrofida bo‘lishi kutilmoqda.
Toshkent, Samarqand, Sirdaryo va Jizzax viloyatlari
Havo quruq va barqaror bo‘lib qoladi. Kechalari 0–5 daraja iliq, kunduzlari 13–18 daraja iliq bo‘ladi. Shamol sharqdan esadi.
Qashqadaryo va Surxondaryo viloyatlari
Janubiy hududlarda ham yog‘ingarchilik kuzatilmaydi. 25-26 noyabrda kechalari 2–7 daraja iliq, 27–28 noyabrda esa 0–5 daraja iliq bo‘ladi. Kunduzgi harorat 14–19 daraja oralig‘ida saqlanadi.
Andijon, Namangan va Farg‘ona viloyatlari
Sharqiy hududlarda havo o‘zgaruvchan, ammo yog‘ingarchilik kutilmaydi. Ba’zi manzillarda tuman kuzatilishi mumkin. Kechalari 0–5 daraja iliq, kunduzlari 11–16 darajagacha yetadi.
Respublikaning tog‘li hududlari
Tog‘larda ham havo quruq bo‘ladi. Kechalari 0–5 daraja iliq, kunduzlari 8–13 daraja iliq saqlanadi. Shamol mahalliy hududlarda biroz kuchayishi mumkin.
Avvalroq Kursiv Uzbekistan «OʻzGidromet» direktori Sherzod Habibullayevning havo sifatining yomonlashuvi bir vaqtning oʻzida namoyon boʻlgan uchta asosiy tabiiy omil bilan bogʻliqligi haqida bildirgan bayonotini yozgandi.
