1-dekabrdan O‘zbekistonda nimalar o‘zgaradi
1-dekabrdan O‘zbekistonda yangi tartiblar kuchga kiradi. Kursiv Uzbekistan bu sanadan boshlab amal qiladigan yangiliklarni bir joyga to‘pladi.
- Bojxona tizimida «Tolling operatsiyalari» moduli joriy etiladi
- Atrof-muhit monitoringiga oid ochiq ma’lumotlar bazasi ishga tushadi
- 1-dekabrdan O‘zbekistonda AI-80 benzini sotuvi to‘xtatiladi
- Nikohdan oldingi tibbiy ko‘rik talabi bekor qilinadi
- Tadbirkorlarga qo‘shimcha kafolat va kafilliklar beriladi
- Iste’molchi, tadbirkor, NNT va davlat organlari hamkorligi yo‘lga qo‘yiladi
- Zilzila kuchini ko‘rsatadigan akselerogrammadan foydalaniladi
- Turizm xodimlari malakasi oshiriladi
- 1-dekabrdan nimalar tugaydi
Bojxona tizimida «Tolling operatsiyalari» moduli joriy etiladi
Shu yilning 1-dekabridan bojxona hududida yoki hududidan tashqarida qayta ishlash rejimlarida bojxona yuk deklaratsiyasini soddalashtirilgan tartibda rasmiylashtirish imkonini beruvchi «Tolling operatsiyalari» moduli joriy etiladi.
Atrof-muhit monitoringiga oid ochiq ma’lumotlar bazasi ishga tushadi
O‘zbekiston Orxus konvensiyasiga qo‘shilganligi munosabati bilan 2025-yil 1-dekabrdan boshlab atrof-muhit monitoringiga oid ochiq ma’lumotlar bazasi jamoatchilikka taqdim etiladi. Bu bazada daraxt ekish, chiqindilarni qayta ishlash, qonun buzilish holatlari va boshqa muhim ekologik ma’lumotlar joylashtiriladi.
Ma’lumot uchun, may oyida Shavkat Mirziyoyev tomonidan «2030-yilgacha aholining ekologik madaniyatini yuksaltirish konsepsiyasi» tasdiqlangandi.
Unga ko‘ra, hujjatda maktabgacha ta’lim tashkilotlarida 3,3 mln nafar tarbiyalanuvchi, umumiy o‘rta ta’limda esa 4,2 mln o‘quvchiga ekologik tarbiya berish asosiy maqsad qilib belgilangan.
1-dekabrdan O‘zbekistonda AI-80 benzini sotuvi to‘xtatiladi
O‘zbekistonda 2025-yil 1-dekabrdan AI-80 benzini savdosi to‘xtatiladi. Prezidentning 18-noyabr kuni qabul qilgan qaroriga ko‘ra, ekologik toza yonilg‘iga o‘tish va havoning sifatini yaxshilash maqsadida bu turdagi benzin AYoQShlarda endi realizatsiya qilinmaydi.
Jarayonning bajarilishi Neft mahsulotlari va gazdan foydalanishni nazorat qilish inspeksiyasi hamda Ekologiya qo‘mitasi tomonidan kuzatiladi. Bajarilishi belgilangan ekologik chora-tadbirlar doirasida poytaxtda yuk tashuvchi avtomobillar harakati tig‘iz vaqtlarda cheklanadi.
Nikohdan oldingi tibbiy ko‘rik talabi bekor qilinadi
1-dekabrdan nikohni rasmiylashtirishda fuqarolik holati dalolatnomalarini yozish organlari (FHDYO) tomonidan nikohlanayotgan shaxslardan tibbiy ko‘rik natijalarini talab qilish amaliyoti bekor qilinadi.
Shuningdek, sud qarori asosida nikohdan ajratilganda, ajrim qayd etilishi uchun sud qarorini FHDY organlariga topshirish talabi ham tugatiladi.
Avtotransport vositasini ro‘yxatdan o‘tkazishda esa guvohnomada mulkdorning manzilini ko‘rsatish majburiyati bekor qilinadi.
Tadbirkorlarga qo‘shimcha kafolat va kafilliklar beriladi
2025-yil 1-dekabrdan tadbirkorlarga qo‘shimcha kafolat va kafilliklar berilishi belgilandi. Yirik loyihalar uchun 10 mlrd so‘mgacha, ayrim hollarda undan ortiq miqdorda kafolatlar taqdim etiladi. Yaxshi kredit tarixiga ega tadbirkorlarga esa mavjud limit 1,5 baravargacha oshiriladi.
Iste’molchi, tadbirkor, NNT va davlat organlari hamkorligi yo‘lga qo‘yiladi
1-dekabrdan boshlab «iste’molchi – tadbirkor – nodavlat notijorat tashkilotlar – davlat organlari» o‘rtasida o‘zaro hamkorlikni yo‘lga qo‘yuvchi yangi raqamli tizim joriy etiladi.
Zilzila kuchini ko‘rsatadigan akselerogrammadan foydalaniladi
2025-yil 1-dekabrdan loyihalash jarayonida hududlarning zilzila kuchini ko‘rsatadigan akselerogramma bazalari qo‘llaniladi. Shuningdek, bir xil loyiha seriyasiga bir marta to‘lov asosida xulosa beriladi, shu turdagi qolgan loyihalar uchun alohida to‘lov olinmaydi.
Turizm xodimlari malakasi oshiriladi
Shu yilning 1-dekabridan boshlab turizm sohasi xodimlari shartnoma asosida qayta tayyorlanadi va malakasini oshiradi. Har yili Butunjahon turizm tashkilotiga a’zo davlatlarning 100 nafar iqtidorli mutaxassisi uchun Akademiya dasturlarida tahsil olish bo‘yicha maxsus grantlar ajratilishi ham belgilangan.
1-dekabrdan nimalar tugaydi
2025-yil 1-dekabrgacha Ijtimoiy qo‘llab-quvvatlash markazlari huzurida o‘zgalar parvarishiga muhtoj voyaga yetgan shaxslar uchun kichik hajmli oilaviy uylar tashkil etilishi rejalashtirilgan.
1-dekabrgacha barcha hududlarda sertifikatga ega bo‘lmagan o‘qituvchilar uchun qo‘shimcha o‘quv mashg‘ulotlari tashkil etiladi. Ularni milliy va xalqaro test sinovlariga tayyorlash uchun malakali mutaxassislar jalb qilinadi.
Ekologiya va iqlim o‘zgarishi milliy qo‘mitasi barcha sanoat korxonalariga 2025-yil 1-dekabrgacha atmosfera havosiga chiqariladigan zararli moddalarni ikki baravar kamaytirish topshirig‘ini berdi.
Korxonalar avtomatik monitoring stansiyalarini o‘rnatishi, chang-gaz va suv tozalash uskunalarini modernizatsiya qilishi, shuningdek, sanitar himoya zonalarini kuzatuv postlari bilan jihozlashi shart. Majburiyatni bajarmaganlar uchun kompensatsiya to‘lovlari besh baravarga oshiriladi va faoliyatiga nisbatan ma’muriy yoki jinoiy choralar qo‘llanilishi mumkin.
