19 yoshli grossmeyster, FIDE Jahon shaxmat kubogi sohibi Javohir Sindarov O‘zbekistonga yetib keldi. Chempion poytaxt xalqaro aeroportida tantanali ravishda kutib olindi.
Chempionni tantanali kutib olish marosimi Toshkent aeroportining mahalliy aviaqatnovlar terminalida o‘tkazildi. Tadbirda O‘zbekiston Respublikasi bosh vaziri Abdulla Aripov, sport tashkilotlari vakillari, shaxmatchilar, chempionning oilasi va do‘stlari ishtirok etdi.
Marosimda chempionga uch xonali xonadon va 123 600 000 miqdoridagi pul mukofoti topshirildi. Uning murabbiyiga esa 61 800 000 miqdoridagi mukofot puli taqdim etildi.
Eslatib o‘tamiz, Javohir Sindarov bir kun oldin Jahon kubogi finalida xitoylik grossmeyster Vey Iyni mag‘lub etib, 2026-yilgi nomzodlar turniriga yo‘llanmani qo‘lga kiritdi. Sindarov turnir tarixidagi eng yosh chempion sifatida tarixga kirgan. Prezident farmoniga binoan, shaxmat bo‘yicha milliy terma jamoa a’zosi Javohir Sindarov «O‘zbekiston Respublikasida xizmat ko‘rsatgan sportchi» faxriy unvoni bilan taqdirlandi.
