Airbus 6 mingga yaqin A320 samolyotini dasturiy nosozlik sabab chaqirib olmoqda
Yevropaning Airbus aviakompaniyasi bort dasturiy ta’minotidagi nosozlik sabab A320 seriyasiga mansub qariyb 6 mingta samolyotni chaqirib olayotganini ma’lum qildi. Bu haqda Reuters xabar berdi.
Muammo aviakompaniyalarni eski dasturiy versiyaga vaqtincha qaytishga majbur qilmoqda. A320 parkidagi parvozlarning taxminan uchdan ikki qismi qisqa muddatga to‘xtatilishi mumkin.
Ayrim aviakompaniyalar allaqachon reyslarni bekor qilishni boshlagan. Ular orasida Germaniyaning Lufthansa, Kolumbiyaning Avianca, Hindistonning IndiGo va Vengriyaning Wizz Air aviakompaniyalari bor. Eng yirik A320 operatori hisoblangan American Airlines muammoni 29-noyabr kuni bartaraf etishni rejalashtirayotganini bildirgan.
Xitoy aviakompaniyalari ham katta A320 parkiga ega. China Eastern Airlines ixtiyorida 320 dan ortiq, China Southern Airlines flotida esa 334 tadan ziyod A320 samolyoti mavjud.
Kursiv Uzbekistan O‘zbekiston aviakompaniyalariga ham rasmiy so‘rov yubordi. Mamlakatda ushbu turdagi samolyotlardan foydalanishga ta’siri bor-yo‘qligi aniqlanmoqda.
Airbus A320 tor fyuzelyajli samolyot bo‘lib, ilk parvozini 1987-yil qishda amalga oshirgan. Model yaqin va o‘rta masofali reyslar uchun mo‘ljallangan. U dunyodagi eng ko‘p sotilgan yo‘lovchi samolyotlaridan biri hisoblanadi.
Eslatib o‘tamiz, Kursiv Uzbekistan nashri Azimut aviakompaniyasi Rostovdan Termizga parvozlarni yo‘lga qo‘yishi haqida yozgan edi.
