Apple kompaniyasi ilk bor asosiy Apple M7 chipini TSMC emas, balki Intel’da ishlab chiqarishni ko‘rib chiqmoqda. Bu haqda taniqli tahlilchi Min-Chi Kuo xabar berdi.
Ma’lumotga ko‘ra, kelajakda MacBook Air, iPad va ehtimol arzonroq Vision Pro qurilmalari uchun mo‘ljallangan standart M7 modeli Intel’ning 18A texnologiyasi asosida ishlab chiqarilishi mumkin. Intel Apple uchun moslashtirilgan ushbu jarayonni ichki ravishda 18AP deb nomlagan.
Chipni ommaviy ishlab chiqarish 2027-yilda boshlanishi kutilmoqda. Shu sababli, ushbu qarorning natijalari yaqin yillarda ko‘rinmaydi.
Ayni paytda kuchliroq M7 Pro va M7 Max versiyalari an’anaviy hamkor bo‘lgan TSMC’da ishlab chiqarilishi saqlab qolinadi. Ular kompaniyaning yangi N2P texnologiyasi yoki takomillashtirilgan A18 jarayonida tayyorlanishi rejalashtirilmoqda. Shu tariqa Apple ishlab chiqarish hajmini turli hamkorlarga taqsimlab, eng muhim yuqori samarali chiplarini ishonchli ishlab chiqaruvchi bilan qoldirmoqchi.
So‘nggi yillarda ishlab chiqarishdagi kechikishlar va mijozlar yo‘qotilishi fonida Intel yangi imkoniyat izlayotgan edi. Apple kabi yirik mijoz bilan ishlash Intel uchun boshqa kompaniyalarni, jumladan, Qualcomm kabi ishlab chiqaruvchilarni ham jalb etishda muhim omil bo‘lishi mumkin.
Apple uchun bu qadam ta’minot zanjirini kengaytirish strategiyasi sifatida baholanmoqda. Kompaniya past narx segmentidagi millionlab MacBook va iPad qurilmalariga chip yetkazib berish uchun katta ishlab chiqarish quvvatiga muhtoj. Ushbu yuklamaning bir qismini Intel’ga topshirish orqali TSMC yuqori daromad keltiruvchi murakkab chiplar bilan shug‘ullanish imkoniyatiga ega bo‘ladi, Apple esa uzoq muddatda muqobil ishlab chiqaruvchiga ega bo‘lishi mumkin.
Eslatib o‘tamiz, Kursiv Uzbekistan nashri Apple kompaniyasining rivojlanish va muvaffaqiyat tarixi haqida maqolasini e’lon qilgan edi.
