AQSh valyutasi hafta davomida 12,37 so‘mga pasaydi, Airbus 6 mingga yaqin A320 samolyotini chaqirib olmoqda — 29-noyabrning eng muhim hodisalari Kursiv uzbekistan dayjestida.
Hafta davomida davomida dollar qanchaga pastladi
24 – 28-noyabr kunlari O‘zbekistonda AQSh dollarining rasmiy kursi notekis harakatlandi. Haftaning boshida valyuta asta-sekin mustahkamlanib, keyin pasaydi va yakunda yana biroz ko‘tarildi. «Kursiv» nashrining ushbu maqolasida dollar kursining hafta davomidagi o‘zgarishi haqida so‘z boradi.
Chevrolet’ning yangi elektromobili qanday xususiyatlar bilan chiqadi
General Motors tomonidan Shanxaydagi GM China Advanced Design studiyasi ishlab chiqqan Chevrolet’ning yangi elektromobil konsepti taqdim etildi. Bu haqda Car Guide xabar bermoqda.
Yangi model, asosan, Xitoy bozori uchun mo‘ljallangan bo‘lib, brendning kelajakdagi ixcham elektromobillari dizayn yo‘nalishini ko‘rsatib beradi.
Konsept hozircha faqat dizayn bosqichida. Shu sabab texnik xususiyatlar oshkor etilmagan. Biroq aynan shu uslub keyingi avlod Chevrolet elektromobillari uchun global dizayn asosiga aylanishi mumkin.
Umattaliyev va Mo‘ydinxo‘jayev professional boksda yorqin debyut qildi
Chelyabinskda bo‘lib o‘tgan professional boks oqshomida o‘zbekistonlik chempionlar Javohir Umattaliyev va Asadxo‘ja Mo‘ydinxo‘jayev ilk professional janglarini muvaffaqiyatli o‘tkazdi. Har ikki sportchi yuqori saviyasini namoyish etdi.
Janglardan so‘ng ular Britaniyaning Queensberry promouterlik kompaniyasi bilan shartnoma imzolagani ma’lum bo‘ldi.
Airbus 6 mingga yaqin A320 samolyotini dasturiy nosozlik sabab chaqirib olmoqda
Yevropaning Airbus aviakompaniyasi bort dasturiy ta’minotidagi nosozlik sabab A320 seriyasiga mansub qariyb 6 mingta samolyotni chaqirib olayotganini ma’lum qildi. Bu haqda Reuters xabar berdi.
Muammo aviakompaniyalarni eski dasturiy versiyaga vaqtincha qaytishga majbur qilmoqda. A320 parkidagi parvozlarning taxminan uchdan ikki qismi qisqa muddatga to‘xtatilishi mumkin.
Uzbekistan Airways Airbus A320 bilan bog‘liq vaziyatga izoh berdi
Uzbekistan Airways Airbus A320 samolyotlarida dasturiy ta’minot bilan bog‘liq aniqlangan muammolar yuzasidan rasmiy munosabat bildirdi. Avvalroq Reuters Airbus kompaniyasi 6 mingga yaqin A320 laynerini bort dasturini yangilash uchun chaqirib olayotgani haqida xabar qilgan edi.
Aviakompaniya vakilining «Kursiv» nashriga ma’lum qilishicha, hozircha milliy aviatashuvchining qaysi samolyotlariga mazkur choralar tatbiq etilishi bo‘yicha aniq axborot yo‘q.
Avtotransportlar uchun ekologik stiker berish tartibi belgilandi
O‘zbekistonda avtotransportlar uchun ekologik stiker berish tartibi belgilandi. Bu haqda Adliya vazirligi xabar bermoqda.
Yangi hujjatga ko‘ra, avtomobillarning ekologik toifasi ishlab chiqaruvchi tomonidan ko‘rsatilgan ekologik sinf asosida aniqlanadi.
UzAuto Motors aksiyadorlarga $105 mln dividend to‘laydi
«UzAuto Motors» AJ aksiyadorlari 2025-yilning 9 oyi yakunlari bo‘yicha dividend to‘lash haqida qaror qabul qildi. Har bir aksiya uchun 4 642 so‘m miqdorida daromad tasdiqlandi. Ushbu qaror Yagona korporativ axborot portalida e’lon qilindi.
Dividend to‘lovlari uchun jami 1,25 trln so‘m yo‘naltiriladi. Bu qariyb $105 mln ga teng. Qolgan foyda, ya’ni 11 trln so‘mdan ortiq mablag‘ taqsimlanmay qoladi. To‘lovlar Qimmatli qog‘ozlar markaziy depozitariysi orqali amalga oshiriladi.
Farg‘ona va Qashqadaryoda qalbaki aksiz markali alkogol savdosi to‘xtatildi
Farg‘ona va Qashqadaryo viloyatlarida qalbaki aksiz markali alkogol mahsulotlarining savdoga chiqarilishiga chek qo‘yildi. Bu haqda Bosh prokuratura huzuridagi Departament ma’lum qildi.
Farg‘ona shahrida o‘tkazilgan tezkor tadbirda «V.A.» MChJ savdo do‘koni sotuvchisi O.S. xaridorga 2 dona qalbaki aksiz markali alkogol mahsulotini sotayotgan vaqtda ushlandi. Tekshiruv davomida do‘kondan turli nomdagi, umumiy qiymati 106,7 mln so‘mlik qalbaki alkogol mahsulotlari hamda 10,5 mln so‘mlik tamaki mahsulotlari ashyoviy dalil sifatida olib qo‘yildi.
O‘zbekistonda kuryerlik xizmatlari bozori bir yilda 10 foizga oshdi
O‘zbekistonda pochta va kuryerlik xizmatlari bozori 2025-yilning yanvar–oktabr oylarida 5,5 trln so‘mga yetdi. Bu o‘tgan yilning mos davriga nisbatan 10,1 foizga o‘sish demakdir. Bu haqda Milliy statistika qo‘mitasi xabar bermoqda.
Bozor hajmi bo‘yicha Toshkent shahri yetakchi bo‘lib qolmoqda. Poytaxtda ushbu xizmatlar hajmi 2,9 trln so‘mni tashkil etdi.
