General Motors tomonidan Shanxaydagi GM China Advanced Design studiyasi ishlab chiqqan Chevrolet’ning yangi elektromobil konsepti taqdim etildi. Bu haqda Car Guide xabar bermoqda.
Yangi model asosan Xitoy bozori uchun mo‘ljallangan bo‘lib, brendning kelajakdagi ixcham elektromobillari dizayn yo‘nalishini ko‘rsatib beradi.
Konsept hozircha faqat dizayn bosqichida. Shu sabab texnik xususiyatlar oshkor etilmagan. Biroq aynan shu uslub keyingi avlod Chevrolet elektromobillari uchun global dizayn asosiga aylanishi mumkin.
Model panjarasiz old qismga ega. Optika ajratilgan dizaynda ishlangan. Old panel silliq ko‘rinishda bajarilgan. Chevrolet logotipi yoritish funksiyasiga ega bo‘lishi mumkin. Bu element Xitoy elektromobil bozorida e’tibor qozonish uchun mo‘ljallangan.
Dastlabki eskizlarda kuzov juda keskin va dinamik ko‘rinadi. Realistik renderlarda esa biroz soddaroq talqin qilinadi. Shunga qaramay, umumiy qiyofa sport xarakterini saqlab qolgan.
Eng ko‘zga tashlanadigan detal – panoramali oynalardir. U avtomobilning yuqori qismini to‘liq qamrab oladi. Bu esa massiv S-ustunni yanada ajratib ko‘rsatadi. To‘q ko‘k va qora rang uyg‘unligi obrazni yorqin qiladi, biroq ortiqcha agressivlik bermaydi. G‘ildiraklar hajmi kichraytirilsa va shou-kar o‘tirishi o‘zgartirilsa, tashqi ko‘rinish seriyali Chevrolet modellari, xususan Tracker RS yoki oldingi Bolt’ga yaqinlashadi.
Texnik ma’lumotlar hozircha ochiqlanmagan. GM platforma, akkumulyator yoki elektr motor haqida hech qanday tafsilot bermadi. Umumiy proporsiyalar esa orqa joylashtirilgan elektromotor va o‘rtacha sig‘imli batareya bo‘lishi mumkinligini anglatadi.
Kompaniya dunyo miqyosida ham arzonroq elektromobillar ustida ish olib bormoqda. Shu bois ushbu konsept kelajakda taqdim etiladigan ixcham elektr krossoverlar uchun vizual prototip vazifasini bajarishi mumkin. Dizaynda toza sirtlar, keskin chiziqlar, krossover amaliyoti va shaharlik yosh xaridorlarni jalb eta oladigan ifodali tashqi ko‘rinishga alohida e’tibor qaratilgan.
Eslatib o‘tamiz, Kursiv Uzbekistan nashri Chevrolet Damas avtomobilining xavfsizlik ko‘rsatkichlari haqida yozgan edi.
