Gonkongdagi yirik turarjoy majmuasida yuz bergan dahshatli yong‘in oqibatida halok bo‘lganlar soni 94 nafarga yetdi. Bu haqda Xitoyning Sinxua agentligi xabar berdi.
Gonkong rahbari Jon Li yong‘in, asosan, nazorat ostiga olinganini bildirdi. Uning aytishicha, voqea joyida ishlatilgan bambukdan yasalgan qurilish to‘sinlari va tashqi himoya to‘rlari olovning juda tez tarqalishiga sabab bo‘lgan.
Fojia Tay Poo hududidagi Wang Fuk Court turarjoy majmuasida sodir bo‘lgan. Yong‘in avval qurilish o‘ramlari va tashqi himoya setkasidan boshlangan, so‘ng butun majmuaga tarqalgan.
Majmuada qariyb 2 mingta xonadon bo‘lgan va u yerda 4,8 mingdan ortiq odamlar, jumladan, ko‘plab keksalar yashagan. Binolar 1980-yillarda qurilgan.
Xitoy va Gonkong hukumati keng ko‘lamli tergov boshlagan. Hozirga kelib majmuada rekonstruksiya ishlarini olib borgan qurilish kompaniyasining uch nafar rahbari qo‘lga olingan.
Bu voqea Gonkongda so‘nggi 17 yil ichidagi eng yirik yong‘in fojiasi sifatida qayd etilmoqda.
O‘zbekiston Tashqi ishlar vazirligi Gonkongda sodir bo‘lgan yirik yong‘in oqibatida halok bo‘lganlar haqidagi xabarni chuqur qayg‘u bilan qabul qilganini ma’lum qildi. Rasmiy bayonotda marhumlarning oila a’zolari va yaqinlariga hamdardlik izhor etildi, jarohat olganlarga esa tezroq sog‘ayib ketish tilaklari bildirildi.
Vazirlikka ko‘ra, O‘zbekistonning Xitoydagi elchixonasi va konsulliklari voqea yuzasidan mahalliy hokimiyat vakillari bilan aloqa o‘rnatgan. Olib borilgan tekshiruvlar natijasiga ko‘ra, hozirgi paytga qadar halok bo‘lganlar yoki jarohatlanganlar orasida O‘zbekiston fuqarolari aniqlanmagan.
Avvalroq Kursiv Uzbekistan Yaponiyada yuz bergan yong‘in natijasida 170 dan ortiq uylar yonib ketgani haqida yozgandi.
