Uzbekistan Airways Airbus A320 bilan bog‘liq vaziyatga izoh berdi
Uzbekistan Airways Airbus A320 samolyotlarida dasturiy ta’minot bilan bog‘liq aniqlangan muammolar yuzasidan rasmiy munosabat bildirdi. Avvalroq Reuters Airbus kompaniyasi 6 mingga yaqin A320 laynerini bort dasturini yangilash uchun chaqirib olayotgani haqida xabar qilgan edi.
Aviakompaniya vakilining «Kursiv» nashriga ma’lum qilishicha, hozircha milliy aviatashuvchining qaysi samolyotlariga mazkur choralar tatbiq etilishi bo‘yicha aniq axborot yo‘q.
«Hozircha bizning flotdan qaysi bortlar ushbu jarayonga tushishi ma’lum emas. Hatto kamida bitta samolyot ta’sir ostida qoladimi-yo‘qmi ham aniqlashtirilmagan. Faqat kutish qolmoqda», — dedi kompaniya vakili.
Airbus kompaniyasi A320 seriyasi samolyotlarida parvozlarni boshqarish tizimida muammolar yuzaga kelishi mumkinligini bildirgan. Aniqlik kiritilishicha, muammoga quyosh nurlanishining yuqori darajada ta’sir qilishi salbiy omil sifatida qayd etilgan. Ishlab chiqaruvchi aviatsiya rasmiylari bilan hamkorlikda vaziyat ustidan nazorat olib borayotganini ta’kidlagan.
Nashrlar xabariga ko‘ra, ayrim yirik aviakompaniyalar allaqachon reyslarni bekor qilgan. Xususan, Air France dasturiy ta’minotni yangilash uchun 35 ta reysni to‘xtatgan. Yaponiyaning All Nippon Airways esa ichki yo‘nalishlarda 60 tadan ortiq parvozni bekor qilib, samolyotlarni tekshiruvdan o‘tkazgan.
Kursiv Uzbekistan nashri Centrum Air 2026-yilda Frankfurt va Kopengagenga to‘g‘ridan to‘g‘ri reyslarni yo‘lga qo‘yishi haqida yozgan edi.
