Mazda kompaniyasi Mazda CX-5 krossoverining uchinchi avlodini rasman namoyish qildi. Yangi model dizayndan ko‘ra texnologiyalar va raqamli servislar rivojiga urg‘u berishi bilan ajralib turadi.
Avtomobil o‘lchamlari kattalashib, jismoniy boshqaruv tugmalarining aksariyati olib tashlandi. Krossover zamonaviy EEA+ platformasiga o‘tdi. Ushbu arxitektura onlayn ulanish imkoniyatlari, OTA yangilanishlar va kengaytirilgan haydovchi yordamchi tizimlarini ta’minlaydi.
Yevropa bozori uchun dastlabki narxlar e’lon qilindi. Mazda CX-5 qiymati 35 ming yevrodan boshlanadi. Model old va to‘liq uzatma variantlarida taklif etiladi. Dvigatel sifatida sinovdan o‘tgan 2,5 litrli benzinli Skyactiv-G saqlanib qolgan. U avtomat uzatmalar qutisi bilan ishlaydi.
Asosiy yangilik — Google servislarining to‘liq integratsiyasi bo‘ldi. Interfeys bir vaqtning o‘zida uchta displeyga uzatiladi. Raqamli panel 10,25 dyuymga ega. Proyeksion displey ham mavjud. Markaziy sensorli ekran esa 12,9 yoki 15,6 dyuymli variantlarda taklif etiladi. Apple CarPlay va Android Auto tizimlari saqlanib qolgan. Google ovozli yordamchisi keyinchalik Gemini platformasiga yangilanadi.
Salon texnologik jihatdan sezilarli darajada yangilandi. Rulda sensorli boshqaruv tugmalari paydo bo‘ldi. Ovoz orqali boshqarish tizimi takomillashtirildi. Yuqori komplektatsiyalarda kuchliroq premium audio tizimi taqdim etilishi rejalashtirilgan.
Eslatib o‘tamiz, Kursiv Uzbekistan nashri Mazda Iconic SP sport avtomobili taqdim etilgani haqida yozgan edi.
