O‘zbekistonda hafta davomida qanday yangiliklar yuz berdi

O‘zbekistonda o‘tgan hafta davomida bir qancha yangiliklar yuz berdi. Kursiv Uzbekistan ularni bir joyga jamladi.

O‘zbekistonda gaz eksporti oshdi

O‘zbekistonda yanvar – oktabr oylarida gaz eksporti oshdi. Joriy yilning o‘n oyida gaz eksporti $568,2 mlnga yetdi. Yillik o‘sish 5,1 foizni tashkil etdi. Xitoy bojxonachilarining ma’lumotlariga ko‘ra, O‘zbekiston yanvar – oktabr oylarida Xitoyga umumiy qiymati $695,58 mln bo‘lgan gaz xomashyosi yetkazib bergan.

Qurilish tashkilotlari qat’iy ogohlantirildi

Ekologiya va iqlim o‘zgarishi milliy qo‘mitasi barcha qurilish tashkilotlariga atmosfera havosini muhofaza qilish bo‘yicha belgilangan talablarga qat’iy rioya etishni talab qildi. Qurilish maydonlarida chang va qum zarrachalari tarqalishining oldini olish, osma yomg‘irlatgich va suv purkagichlar o‘rnatish, transport vositalarini yuvish shoxobchasini tashkil etish va maydonni himoya qoplamalari bilan jihozlash majburiydir.

Nyu-Yorkda aholiga 12 ming dollarlik kriptovalyuta tarqatiladi

GiveDirectly notijorat tashkiloti Nyu-York shahrida kriptovalyuta orqali to‘g‘ridan to‘g‘ri pul o‘tkazish bo‘yicha sinov dasturini ishga tushirdi. Dastur doirasida tanlab olingan 160 nafar odamga jami $12 ming qiymatidagi kriptovalyuta beriladi. Ishtirokchilar sentabr oyidan $800 miqdorida to‘lov qabul qilishdi. Noyabr oyida esa ularga $8 ming bir martalik mablag‘ o‘tkazib berildi. To‘lovlar AQSh dollariga tenglashtirilgan USDC (stablecoin) valyutasida amalga oshirilmoqda va dastur fevral oyida yakunlanadi.

Toshkent shahridagi ekologik vaziyatni yaxshilash uchun komissiya tuzildi

Shavkat Mirziyoyev «Toshkent shahrida ekologik vaziyatni yaxshilash boʻyicha toʻxtatib boʻlmaydigan chora-tadbirlar toʻgʻrisida»gi farmonni imzoladi. Farmon asosida poytaxtda ekologik vaziyatni yaxshilash uchun kechiktirib bo‘lmaydigan chora-tadbirlarni amalga oshiruvchi maxsus komissiya ishga tushdi.

Oʻzbekiston «JCh – 2026» qur’asida uchinchi savatdan joy oldi

FIFA 2026-yilgi Jahon chempionati qur’asi uchun savatlarni e’lon qildi. Unga ko‘ra, Oʻzbekiston milliy terma jamoasi 3-savatdan joy oldi. Qur’a tashlash marosimi 5-dekabr kuni AQShning Vashington shahridagi Kennedy Center majmuasida boʻlib oʻtadi. Qur’a jarayonida har bir guruh toʻrtta jamoadan iborat boʻladi, har bir savatdan bittadan terma jamoa tanlanadi. Shu sababli Oʻzbekiston 3-savatdan joy olgan Norvegiya, Panama, Misr, Jazoir, Shotlandiya, Paragvay, Tunis, Kot-dʼIvuar, Qatar, Saudiya Arabistoni va Janubiy Afrika bilan guruh bosqichida toʻqnash kelmaydi.

Javohir Sindarov shaxmat bo‘yicha Jahon Kubogi g‘olibi bo‘ldi

O‘zbekistonlik grossmeyster Javohir Sindarov shaxmat bo‘yicha Jahon Kubogi finalida g‘alaba qozonib, musobaqa chempioniga aylandi. Hal qiluvchi bahsda Sindarov jahon reytingida yuqori o‘rinlardan birini egallab turgan Xitoy vakili Vey Yini tay-brekda dog‘da qoldirdi. Chempionlik uchun kechgan kurash murosasiz o‘tdi. Asosiy partiyalarda tomonlarning kuchlari teng kelgach, g‘olib nomi tay-brek (qo‘shimcha qisqa vaqtli partiyalar) orqali aniqlandi.

Urgut – Samarqand yo‘nalishida har kunlik poyezd qatnovi yo‘lga qo‘yildi

Shu yilning 27-noyabridan Urgut – Samarqand yo‘nalishida 6202/6201 va 6204/6203-sonli shaharlararo poyezdlarining har kunlik qatnovi yo‘lga qo‘yildi. Poyezdlar quyidagi jadval asosida harakatlanadi:

O‘zbekiston bozorlarida havo tozalagichlar narxi keskin oshdi

Toshkentdagi «Malika» maishiy texnika bozorida havo tozalagichlar va uy namlagichlari narxi sezilarli ravishda oshdi. Sotuvchilar ulgurji partiyalar qimmatlasha boshlaganini, bojxona bojlari bekor qilingach kutilgan arzonlashuv esa hali bozorga yetib kelmaganini aytmoqda. Poytaxtda havo sifati yomonlashgani ortidan talab oshgani narxlarning yanada ko‘tarilishiga sabab bo‘lgan.

AQShda noqonuniy yurgan o‘zbekistonliklar ogohlantirildi

O‘zbekiston Tashqi ishlar vazirligi AQSh hududida noqonuniy migrantlarga qarshi kuchaytirilgan tekshiruvlar boshlanganini ma’lum qildi. Bu haqda vazirlik matbuot kotibi Axror Burxanov o‘z Telegram kanalida xabar bergan. Unga ko‘ra, so‘nggi kunlarda AQSh bo‘ylab federal migratsiya organlari tomonidan keng ko‘lamli reydlar o‘tkazilmoqda. Federal trassalarda haydovchilarning hujjatlari, haydovchilik guvohnomasining haqiqiyligi, muddati, ularning ishga ruxsatnomasi va migratsion maqomi sinchiklab tekshirilmoqda. Bundan tashqari, inspektorlar haydovchilarning ingliz tilidagi muloqot darajasiga ham e’tibor qaratmoqda.

Dollar kursi o‘zgarishiga 2026-yilda qaysi omillar ta’sir qiladi

2026-yilda dollar kursining o‘zgarishiga bir vaqtning o‘zida bir nechta tashqi va ichki omillar ta’sir qiladi. Bu haqda Markaziy bank tomonidan o‘tkazilgan xalqaro davra suhbatida Markaziy bank raisi o‘rinbosari Nodirbek Achilov Kursiv Uzbekistan’ga ma’lum qildi. Achilovning aytishicha, tashqi omillar qatoriga tashqi savdo hamkorlaridagi vaziyat, u yerda kurs va inflyatsiya darajasi, shuningdek, iqtisodiy faollik kiradi.

Toshkent 2026-yilgi World Boxing kubogi final bosqichiga mezbonlik qiladi

Toshkent 2026-yilgi World Boxing kubogi final bosqichiga mezbonlik qiladi. Liverpulda bo‘lib o‘tgan jahon chempionati davomida World Boxing tashkiloti kubogining final bosqichini o‘tkazish bo‘yicha arizalar qabul qilingandi. O‘zbekiston boks federatsiyasi ham mezbonlik uchun o‘z taqdimotini World Boxing ijroiya qo‘mitasiga taqdim etdi.

«Real Sanjik» taxallusi bilan tanilgan bloger hibsga olindi

26-noyabr kuni Toshkent shahar IIBB tomonidan o‘tkazilgan maxsus reyd chog‘ida ijtimoiy tarmoqlarda «Real Sanjik» nomi bilan faoliyat yuritib kelgan S.K. qo‘lga olingan. Bu haqda «Ezgulik» jamoatchilik tashkiloti rahbari Abdurahmon Tashanov ma’lum qildi. Unga ko‘ra, bloger tovlamachilik va o‘qotar qurolni qonunga xilof ravishda saqlash kabi jinoyatlarda gumonlanmoqda. Hozircha rasmiy idoralar tomonidan voqea yuzasidan izoh berilmagan.

Hafta davomida davomida dollar qanchaga pastladi

24 – 28-noyabr kunlari O‘zbekistonda AQSh dollarining rasmiy kursi notekis harakatlandi. Haftaning boshida valyuta asta-sekin mustahkamlanib, keyin pasaydi va yakunda yana biroz ko‘tarildi. «Kursiv» nashrining ushbu maqolasida dollar kursining hafta davomidagi o‘zgarishi haqida so‘z boradi.

Avtotransportlar uchun ekologik stiker berish tartibi belgilandi

O‘zbekistonda avtotransportlar uchun ekologik stiker berish tartibi belgilandi. Bu haqda Adliya vazirligi xabar bermoqda. Yangi hujjatga ko‘ra, avtomobillarning ekologik toifasi ishlab chiqaruvchi tomonidan ko‘rsatilgan ekologik sinf asosida aniqlanadi.

UzAuto Motors aksiyadorlarga $105 mln dividend to‘laydi

«UzAuto Motors» AJ aksiyadorlari 2025-yilning 9 oyi yakunlari bo‘yicha dividend to‘lash haqida qaror qabul qildi. Har bir aksiya uchun 4 642 so‘m miqdorida daromad tasdiqlandi. Dividend to‘lovlari uchun jami 1,25 trln so‘m yo‘naltiriladi. Bu qariyb $105 mln ga teng. Qolgan foyda, ya’ni 11 trln so‘mdan ortiq mablag‘ taqsimlanmay qoladi. To‘lovlar Qimmatli qog‘ozlar markaziy depozitariysi orqali amalga oshiriladi.

Namanganda chiqindidan elektr ishlab chiqaradigan zavod qurilishi boshlandi

Namanganda qattiq maishiy chiqindilarni yoqib, ulardan elektr energiyasi olishga mo‘ljallangan zamonaviy zavod qurilishiga start berildi. Loyihaning umumiy qiymati $141,5 mln bo‘lib, zavod kuniga 1,5 ming tonna yoki yiliga 547 ming tonnagacha chiqindi qayta ishlaydi. Natijada yiliga 227,5 mln kVt/soat elektr energiyasi ishlab chiqariladi. Korxonada 150–200 ta yangi ish o‘rni yaratilishi rejalashtirilgan. Zavod 2027-yilda ishga tushiriladi.

O‘zbekistonda «Jismoniy shaxslarning soliqlari hisobidan xarajatlar» moduli ishga tushiriladi

Prezident qaroriga ko‘ra, 2026-yil 1-yanvardan «Ochiq budjet» portalida yangi modul ishga tushiriladi. Unda jismoniy shaxslar tomonidan to‘langan daromad solig‘i, mol-mulk va yer solig‘i bo‘yicha ma’lumotlar hamda ushbu soliq tushumlari hisobidan amalga oshirilgan budjet xarajatlari ochiq e’lon qilib boriladi.