Prezident qaroriga ko‘ra, 2026-yil 1-yanvardan «Ochiq budjet» portalida yangi modul ishga tushiriladi. Unda jismoniy shaxslar tomonidan to‘langan daromad solig‘i, mol-mulk va yer solig‘i bo‘yicha ma’lumotlar hamda ushbu soliq tushumlari hisobidan amalga oshirilgan budjet xarajatlari ochiq e’lon qilib boriladi.
Shuningdek, 2026-yildan Namangan viloyatida yangi soliq boshqaruvi modeli bo‘yicha eksperiment o‘tkaziladi. Mazkur tartibga ko‘ra, jismoniy shaxslarning mol-mulk yoki yer solig‘i bo‘yicha 1 mln so‘mdan ortiq qarzi bo‘lsa, uni undirishda elektr energiyasining billing tizimidan foydalanish mexanizmi joriy etiladi. Soliq organlari faoliyatini baholashda esa inson omilisiz, avtomatik shakllanadigan ko‘rsatkichlardan foydalanish davom ettiriladi.
Bundan tashqari, 2026-yil 1-yanvardan boshlab jismoniy shaxslar tomonidan ko‘chmas mulkni ijaraga berishdan olingan daromad bo‘yicha to‘langan soliq to‘liq hajmda mulk joylashgan tuman yoki shahar budjetiga yo‘naltiriladi.
Avvalroq Oʻzbekistonda toʻlovlar uchun yagona QR-kod tizimi joriy etilishi xabar qilingandi. Unga koʻra, Markaziy bankka kredit va toʻlov tashkilotlari bilan birgalikda universal QR-kod boʻyicha sinov loyihasini joriy yilning dekabr oyidayoq ishga tushirish topshirilgan. 2026-yil yanvarida esa texnologiyaga oid meʼyoriy-huquqiy baza ishlab chiqiladi.
