Qibraydagi 200 dan ortiq issiqxonalarda reyd o‘tkazildi. Bu haqda Ekologiya va iqlim o‘zgarishi milliy qo‘mitasi xabar berdi.
Xususan, 29-noyabrdan 30-noyabrga o‘tar kechasi Qibray tumanida 100 nafar xodim ishtirokida issiqxonalar, qozonxonalar va ishlab chiqarish obyektlari tekshirildi. Tungi reydda 226 ta issiqxona o‘rganilib, ularning aksariyati talablarga to‘liq javob bermasligi aniqlandi.
Tekshiruvlarga ko‘ra, tumandagi:
- 159 ta obyekt issiqxona sifatida faoliyat yuritmaydi;
- 32 ta obyektda isitish tizimi mavjud emas;
- 29 ta obyekt markaziy isitish tizimiga ulangan;
- bitta obyekt tabiiy gaz tizimiga ulangan;
- 29 ta obyektda ko‘mirdan foydalanilmoqda;
- beshta obyektda o‘tin va boshqa qattiq turdagi yoqilg‘i ishlatilmoqda.
Tekshiruv natijasida ekologik talablarni buzgan to‘qqiz nafar issiqxona egasiga ma’muriy chora ko‘rildi, bir issiqxona faoliyati esa to‘xtatildi.
Avvalroq Toshkentda havoni ifloslantirayotgan 100 dan ortiq obyektlarning faoliyati to‘xtatilgani xabar qilingandi. Unga ko‘ra, poytaxtdagi 1,4 mingta issiqxona o‘rganilib, ulardan 67 tasining ekologiya talablariga rioya qilmagani uchun faoliyati to‘xtatildi. 403 nafar shaxsga ma’muriy bayonnoma rasmiylashtirildi. Ba’zi issiqxonalarga gazga ulanish uchun texnik shartlar berildi.
