O‘zbek milliy taomlari orasida bozorlarda tayyorlanadigan mashhur «Bozor xonim» alohida o‘rin tutadi. Mazali kartoshka va piyozdan tayyorlanadigan qiyma, yupqa yoyilgan xamir, bug‘da pishirilgan yumshoqlik — bularning barchasi uni ko‘pchilikning sevimli taomiga aylantirgan.
Kursiv Uzbekistan retsepti bilan uy sharoitida tayyorlangan bozor xonim bozordagidan ham yanada lazzatli bo‘ladi. Asosiy sir — xamirning yumshoqligi, asosning to‘g‘ri balansi va eng muhimi, pomidorli qaylaning ta’mi.
- Xamir uchun
| Mahsulot | Miqdor |
|---|---|
| Un | 700 g |
| Iliq suv | 230–250 ml |
| Tuz | 1,5 choy qoshiq |
| O‘simlik yog‘i | 2 osh qoshiq |
2. Asos uchun
| Mahsulot | Miqdor |
|---|---|
| Kartoshka | 1 kg |
| Piyoz | 2–3 dona |
| Zira | 1 choy qoshiq |
| Tuz va murch | Ta’bga ko‘ra |
| O‘simlik yog‘i | 20 ml |
3. Qayla uchun
| Mahsulot | Miqdor |
|---|---|
| Pomidor | 2 dona |
| Piyoz | 2 dona |
| Qizil bulg‘or qalampiri | 1 dona |
| Pomidor pastasi | 1 osh qoshiq |
| Suv | Ta’bga ko‘ra |
Tayyorlash bosqichlari
1. Xamirni tayyorlash: Un, tuz, o‘simlik yog‘i va iliq suvdan o‘rtacha qattiqlikdagi xamir qoriladi. U 15–20 daqiqa dam olishi uchun yopib qo‘yiladi. Xamir tindirilganda elastiklashib, yoyishga yengil bo‘ladi.
2. Asosni tayyorlash: Kartoshka juda yupqa somoncha shaklida to‘g‘raladi. Piyoz mayda kub shaklida kesiladi. Hammasi bir idishda aralashtiriladi, tuz, murch, zira va o‘simlik yog‘i qo‘shiladi. Aralashma bir xil bo‘lishi uchun yaxshilab aralashtirib olinadi.
:3. Xamirni yoyish va kesish: Tindirilgan xamir yupqa qilib yoyiladi. Keyin esa to‘rtburchak shakllarda kesib chiqiladi — xonim shakllanishi uchun qulay bo‘ladi.
4. Xonimlarni tugish: Har bir kesilgan xamir bo‘lagining o‘rtasiga asosdan solinadi va chetlari yopishtiriladi. Juda qalin bo‘lishiga yo‘l qo‘ymang — bug‘da pishganda xamir ko‘tariladi.
5. Mantiqosqonga joylash: Mantiqosqon yog‘ bilan yengil surtib chiqiladi. Xonimlar bir-biriga tegmaydigan qilib joylashtiriladi. Xohlaganlar uchun ikki qavat qilib terish ham mumkin: har qavat usti biroz yog‘lanadi. Mantiqosqon gazga qo‘yilib, 30 daqiqa davomida pishiriladi.
6. Qayla tayyorlash: Piyoz yog‘da qizarguncha qovuriladi. Blenderda pomidor, bulg‘or qalampiri va sarimsoqpiyoz maydalab olinadi. Avval pomidor pastasi piyozga solinadi, 2 daqiqadan keyin esa pomidorli aralashma qo‘shiladi. Aralashma 10 daqiqa davomida past olovda qaynaydi. Agar quyuq bo‘lsa, ozgina suv qo‘shish mumkin.
7. Xonimlarni aralashtirish: Pishgan xonimlar tog‘orachaga teriladi. Har bir qavat ustidan qayla quyiladi — taom aynan shu bosqichda lazzatni o‘ziga singdiradi.
8. Dam berish: Xonimlarning usti yopilib, 30 daqiqa chetga qo‘yiladi. Bu vaqtda u qaylani o‘ziga shimib, yanada yumshoq va shirador bo‘ladi.
9. Dasturxonga tortish: Taom likopchalarga solinadi, ustiga mayda to‘g‘ralgan piyoz va ukrop sepiladi. Issiq holda tortiladi.
Yoqimli ishtaha!
