Oppo kompaniyasi yangi A6L smartfonini rasman namoyish qildi. Bu haqda GSMArena nashri ma’lum qildi.
Modelning eng asosiy afzalligi 7000 mA·soat sig‘imdagi yirik akkumulyator bo‘lib, u 80 Vt tezkor quvvatlashni qo‘llab-quvvatlaydi. Bunday sig‘im, ayniqsa, uzoq vaqt video ko‘ruvchilar yoki o‘yin o‘ynaydigan foydalanuvchilar uchun katta ustunlik beradi.
Smartfon Qualcomm Snapdragon 7 Gen 3 protsessori asosida ishlaydi, operatsion tizim Android 15, interfeys esa ColorOS 15. Gadjet zamonaviy talablar darajasida ishlab chiqilgan va unumdorlik bo‘yicha o‘rta sinfning kuchli vakillaridan biri bo‘lishi kutilmoqda.
Ekran va kamera
Oppo A6L AOLED texnologiyasiga ega 6,8 dyuymli displey bilan jihozlangan. Ekran Full HD+ aniqlikni va 120 Gs yangilanish chastotasini taqdim etadi. Bu ko‘rish tajribasini yanada silliq va yoqimli qiladi.
Asosiy kamera 50 megapikselli sensor bilan to‘ldirilgan. Kunlik suratlar, video va ijtimoiy tarmoqlar uchun yetarli darajada sifat ta’minlaydi.
Himoya va xotira
Model IP68/IP69 standartlari bo‘yicha himoyalangan – bu uni suv, chang va mexanik zararlardan yuqori darajada asraydi. Bu funksiyalar odatda flagmanlarda uchraydi, shu bois A6L narxiga nisbatan juda jozibador ko‘rinadi.
Smartfon hozircha bitta konfiguratsiyada sotilmoqda: 12 GB operativ xotira + 256 GB doimiy xotira. Bu kundalik foydalanish, o‘yinlar va ko‘p dasturlar bilan ishlash uchun yetarli hajm.
Narxi va mavjudligi
Oppo A6L hozircha faqat Xitoy bozorida sotuvga chiqarilgan. Rasmiy narxi – $255. Global bozorga qachon chiqishi haqida ma’lumot berilmagan.
Avvalroq Kursiv Uzbekistan Oppo 95 dollarlik A6x smartfonini taqdim qilgani haqida yozgandi.
