Erta tongdan oila a’zolaringizni nonushtada xursand qilish uchun pankeyklardan keyin issiqqina quymoqlar ayni muddaodir. Smetana, murabbo yoki tvorogli qilib tortiladigan bu yupqa quymoqlar nonushta uchun eng yaxshi tanlovlardan biri. Tayyorlash oson, ta’mi esa mayin va klassik.
Kursiv Uzbekistan erta tongdan issiq quymoqlar bilan mehmoningiz bo‘ladi.
| Masalliq nomi | Miqdori |
|---|---|
| Smetana | 100 g |
| Qulupnayli murabbo | 100 g |
| Tvorogli pasta | 100 g |
| Sariyog‘ | 50 g |
Xamir uchun
| Masalliq nomi | Miqdori |
|---|---|
| Iliq sut | 500 ml |
| Qaynoq suv | 150 ml |
| Tuxum | 2 dona |
| O‘simlik yog‘i | 2 osh qoshiq |
| Shakar | 2 osh qoshiq |
| Tuz | Bir chimdim |
| Qabartma (razrixlitel) | 1 choy qoshiq |
| Un (elangan) | 220 g |
Tayyorlash jarayoni
Sutli aralashma: Iliq sutga tuxum, tuz va shakarning barchasini solib, bir hil massa bo‘lguncha aralashtiring.
Xamir tayyorlash: Elangan un va qabartmani qo‘shib, silliq xamir hosil bo‘lguncha aralashtiring.
Yumshoqlik siri: Qaynoq suv va o‘simlik yog‘ini quying — bu quymoqlarga mayinlik beradi.
Qovurish: Qaynoq tovada quymoqlarni ikki tomondan oltin tusga kirguncha qovuring.
Sariyog‘ bilan yumshatish: Tayyor quymoqlar issiq holida sariyog‘ bilan surtib chiqing.
Dasturxonga tortish: Smetana, murabbo yoki tvorogli pasta bilan dasturxonga torting.
Yoqimli ishtaha!
Avvalroq Kursiv Uzbekistan ertalabki nonushtaga tez tayyor bo‘ladigan kefirli pankeyklarni qanday tayyorlash haqida yozgandi.
