Great Wall Motor kompaniyasining Tank brendi 300 dona bilan cheklangan yangi maxsus Tank 300 Polar Edition modelini global bozorda taqdim etdi. Bu haqda CarNewsChina xabar bermoqda.
Yangi versiya $32 mingdan boshlanadi, yuqori konfiguratsiyasi esa $35 minggacha yetadi. Model ilk bor 2025-yil Guangzhou avtosalonida ko‘rsatilgan va o‘sha paytdan buyon oldindan buyurtmalar qabul qilinib kelayotgan edi.
Polar Edition ekstremal sharoitlarda ishlaydigan mutaxassislar va off-road ixlosmandlari uchun mo‘ljallangan. Uning eng asosiy o‘ziga xosligi yorqin Polar Orange kuzov rangi, Polar Edge grafikali bezaklari va old qanotdagi Polar Glory belgisi bilan belgilanadi. Salon ichida esa o‘rindiqlarning bosh qismiga Polar Imprint naqshi tushirilgan bo‘lib, modelning maxsus seriyaga mansubligini ta’kidlaydi.
Ushbu versiya qattiq sovuq hududlar uchun alohida imkoniyatlarga ega. Old oynaning isitilishi va purkagichlarning muzlashdan himoyalanishi past haroratlarda ko‘rish imkonini yaxshilaydi. Qor va muzda harakatlanish uchun maxsus AT shinalar qo‘llaniladi.
Tank 300 Polar Edition ramali konstruksiyaga ega bo‘lib, 4 760 millimetr uzunlik, 1 930 millimetr kenglik va 1 903 millimetr balandlikka ega. G‘ildirak bazasi 2 750 millimetr bo‘lib, kirish burchagi 33 daraja, chiqish burchagi esa 34 daraja etib belgilangan. Bu ko‘rsatkichlar og‘ir relyeflarda barqaror harakatlanishni ta’minlaydi.
Salon dizayni zamonaviy uslubda bo‘lib, markazda 14,6 dyuymli ekran, ro‘parasida esa 12,3 dyuymli raqamli panel joylashgan. Kabina Coffee OS tizimi asosida ishlaydi, Snapdragon 8155 chipi bilan jihozlangan va to‘rt zonali ovozli boshqaruvni qo‘llab-quvvatlaydi. Avtomobilni telefon orqali masofadan boshqarish imkoniyati ham mavjud.
Eslatib o‘tamiz, Kursiv Uzbekistan Tank 300 Polar Edition avtomobili qanday xususiyatlarga egaligi haqida yozgan edi.
