Kun tarixi: «Milan» klubining tashkil etilishi, Qozog‘iston mustaqilligi va «Boston choyxo‘rligi»

16-dekabr sanasi dunyo siyosati, sport va adabiyot olamida muhim voqealar bilan yodda qolgan. Mashhur futbol klubining tashkil topishidan tortib, yangi mustaqil davlatning paydo bo‘lishi va adabiyotdagi yorqin siymolarning tavalludigacha. Kursiv Uzbekistan kunning eng muhim voqealari xronologik tartibda taqdim etadi.

1773-yili Amerikada mashhur «Boston choyxo‘rligi» voqeasi sodir bo‘ldi. Britaniya imperiyasining soliq siyosatiga norozilik sifatida amerikalik kolonistlar ingliz kemalaridagi choylarni okeanga uloqtirishgan. Bu hodisa keyinchalik AQSh mustaqillik urushining boshlanishiga turtki bo‘lgan muhim omillardan biri hisoblanadi.

1775-yilda ingliz adabiyotining yorqin namoyandasi Jeyn Ostin dunyoga keldi. U o‘zining «Andisha va g‘urur», «Emma» kabi romanlari bilan jahon adabiyotida o‘chmas iz qoldirgan. Yozuvchining asarlari bugungi kunda ham sevib o‘qiladi va ko‘plab badiiy filmlarga ssenariy bo‘lib xizmat qilmoqda.

1899-yili Italiyaning afsonaviy «Milan» futbol klubiga asos solindi. Herbert Kilpin va Alfred Edvards tomonidan tuzilgan ushbu jamoa keyinchalik Yevropa va jahon futbolida ko‘plab nufuzli sovrinlarni qo‘lga kiritdi. Klub bugungi kunda dunyodagi eng ko‘p muxlisga ega jamoalardan biri sanaladi.

1920-yilda Xitoyning Gansu provinsiyasida dahshatli Hayyuan zilzilasi yuz berdi. 8,5 balli zilzila oqibatida 200 mingga yaqin inson halok bo‘lgan. Bu XX asrdagi eng vayronkor tabiiy ofatlardan biri sifatida tarixga kirdi.

1946-yili shvetsiyalik musiqachi, mashhur «ABBA» guruhi a’zosi Benni Anderson tavallud topdi. U guruhning ko‘plab xit qo‘shiqlari muallifi sifatida tanilgan va jahon pop-musiqasi tarixida o‘ziga xos o‘rin egallagan.

1988-yilda germaniyalik taniqli futbolchi Mats Hummels tug‘ildi. Himoyachi Germaniya terma jamoasi safida 2014-yilgi Jahon chempionligini qo‘lga kiritgan bo‘lib, zamonaviy futbolning eng ishonchli himoyachilaridan biri sifatida e’tirof etiladi.

1991-yili Qozog‘iston o‘z mustaqilligini e’lon qildi. Mamlakat Oliy Kengashi «Qozog‘iston Respublikasining davlat mustaqilligi to‘g‘risida»gi qonunni qabul qildi. Ushbu sana qardosh qo‘shni davlatda eng muhim milliy bayram sifatida nishonlanadi.

Avvalroq Kursiv Uzbekistan 15-dekabr sanasida sodir bo‘lgan muhim hodisalar haqida xabar bergan edi.