2025-yil 15-dekabr kuni O‘zbekiston va Yevropa Ittifoqi o‘rtasida bozorlar ochilishi bo‘yicha ikki tomonlama protokol imzolandi. Bu O‘zbekistonning Jahon savdo tashkilotiga (JST) a’zo bo‘lish jarayonidagi muhim bosqich hisoblanadi.
Mazkur kelishuv O‘zbekiston prezidenti Shavkat Mirziyoyevning oktabr oyida Bryusselga amalga oshirgan tarixiy tashrifidan so‘ng erishildi. Ushbu tashrif siyosiy darajada kuchli turtki berdi va tomonlarning hamkorlikni chuqurlashtirishga bo‘lgan qat’iy intilishini mustahkamladi.
Hujjat O‘zbekiston nomidan Azizbek Urunov va Yevropa Ittifoqi nomidan elchi João Aguiar Machado tomonidan imzolandi. Tomonlar bu kelishuv ikki tomonlama sheriklik va konstruktiv muloqotning yaqqol natijasi ekanini ta’kidladi.
Imzolangan protokol O‘zbekistonning ko‘p tomonlama savdo tizimiga chuqurroq integratsiyalashuvi yo‘lida yana bir muhim qadam bo‘ldi. Rasmiylar JSTga a’zo bo‘lish jarayonini to‘liq yakunlashga qat’iy sodiq ekanini bildirdi.
Eslatib o‘tamiz, «Kursiv» O‘zbekiston JSTga a’zolik bo‘yicha Ekvador bilan muzokaralarni yakunlagani haqida yozgan edi.
