Italiyaning Ferrari avtomobil ishlab chiqaruvchi kompaniyasi keyingi avlod modellari uchun Samsung bilan hamkorlikni yo‘lga qo‘ymoqda. Bu haqda Sammobile nashri ma’lum qildi.
Kompaniya kelajakdagi avtomobillarida Samsung Display ishlab chiqargan avtomobilga mo‘ljallangan OLED displeylardan foydalanilishini rasman tasdiqladi.
Samsung Display bugungi kunda OLED panellar bo‘yicha dunyodagi yetakchi yetkazib beruvchilardan biri bo‘lib, avtomobil sanoatida ham faol ishlamoqda. Ko‘plab nufuzli avtomobil brendlari infotainment tizimlari uchun aynan Samsung OLED yechimlarini tanlaydi.
Ferrari’ning ilmiy-tadqiqot va ishlanmalar bo‘yicha rahbari Ernesto Lasalandra ta’kidlashicha, Samsung’ning yengil va zamonaviy OLED panellari kompaniyaning yangi avlod modellari ichki raqamli muhitini rivojlantirishda muhim rol o‘ynaydi. Ushbu texnologiya haydovchi va yo‘lovchilar uchun yanada moslashtirilgan, individual interfeyslar va noyob displey joylashuvlarini yaratish imkonini beradi.
Yangi displeylar nafaqat avtomobil salonining estetik ko‘rinishini yaxshilaydi, balki funksional imkoniyatlarni ham kengaytiradi. Ferrari premium va lyuks segmentda faoliyat yuritganligi sababli mijozlar uchun salon ichidagi raqamli tajriba alohida ahamiyatga ega.
Avvalroq Kursiv Uzbekistan Samsung kompaniyasi SATA SSD ishlab chiqarilishi to‘xtatilishi haqidagi gaplarni rad etgani haqida yozgandi.
