Samsung’ning ilk uch buklamali smartfoni Galaxy Z TriFold’da qo‘llanilgan simsiz quvvatlash texnologiyasi bo‘yicha yangi ma’lumotlar paydo bo‘ldi. Bu haqda Sammobile nashri ma’lum qildi.
Qurilmaning nisbatan yupqa korpusini saqlab qolish uchun kompaniya maxsus, yanada ixcham simsiz quvvatlash modulidan foydalangan.
Unga ko‘ra, Galaxy Z TriFold’ga o‘rnatilgan Qi simsiz quvvatlash moduli Witz kompaniyasi tomonidan ishlab chiqilgan. Ishlab chiqaruvchi ushbu modul aynan Samsung’ning birinchi tri-fold smartfoni uchun maxsus yaratilganini bildirgan.
U Wireless Power Consortium (WPC)’ning Qi standarti asosida 15 vattgacha simsiz quvvatlashni qo‘llab-quvvatlaydi. Avval ham Witz Galaxy S va Galaxy Z seriyalaridagi bir qator modellarga simsiz quvvatlash modullarini yetkazib bergan.
Kompaniya vakillarining ta’kidlashicha, yangi yupqa modul ishlash barqarorligi va samaradorligi bo‘yicha Samsung tomonidan yuqori baholangan. Aynan shu sababli u Galaxy Z TriFold kabi texnologik jihatdan murakkab qurilmada qo‘llanilgan.
Galaxy Z TriFold Qi2 Ready sertifikatiga ega. Bu qurilmada magnitlar ichki o‘rnatilmaganini, biroq magnitli maxsus Qi2 Ready g‘ilofi orqali Qi2 aksessuarlarini qo‘llab-quvvatlashini anglatadi.
Avvalroq Kursiv Uzbekistan Samsung Galaxy Z TriFold qanday yig‘ilishi haqida yozgandi.
