Zomindagi osma ko‘prigi sotilmoqda, Rossiyadagi maktabda qotillik, O‘tkir Yusupov yana eski jamoasida — 18-dekabr kungi yangiliklar dayjesti
Qirg‘iziston prezidenti o‘quvchiga o‘z telefonini sovg‘a qildi
Qirg‘iziston prezidenti Sadir Japarov metrlab qalinlikdagi qor uyumlari orasidan maktabga qatnaydigan bola bilan uchrashib, unga o‘zining telefonini berdi. Bu haqda prezident matbuot xizmati xabar berdi.
FIFA o‘yinlarida litsenziya huquqi Netflix’ga berildi
FIFA brendi ostidagi yangi futbol o‘yinlarini ishlab chiqish va nashr etish huquqi Netflix’ga topshirildi. Bu qaror bilan Netflix ilk bor FIFA litsenziyasi asosida videoo‘yin yaratadigan kompaniyaga aylandi.
Zomindagi osma ko‘prik qariyb 150 mlrd so‘mga auksionga qo‘yildi
Jizzax viloyati, Zomin tumanida joylashgan mashhur osma ko‘prik 23-dekabr kuni elektron auksion orqali sotuvga chiqarildi. Savdo e-auksion.uz platformasida bo‘lib o‘tadi.
«Oskar» marosimi YouTube’da bepul namoyish etiladi
2029-yildan boshlab «Oskar» mukofotini topshirish marosimi butun dunyo bo‘ylab YouTube platformasida bepul efirga uzatiladi. Bu bo‘yicha Amerika Kino san’ati va fanlari akademiyasi va YouTube ko‘p yillik hamkorlik to‘g‘risida kelishuvga erishdi.
Rossiyadagi maktabda tojikistonlik 10 yoshli bola o‘ldirildi
Rossiyaning Moskva viloyatida joylashgan maktabda tojikistonlik 10 yoshli o‘quvchining o‘ldirilishi ortidan Tojikiston rasmiylari keskin bayonot bilan chiqdi. Tojikiston Tashqi ishlar vazirligi ushbu jinoyat millatga nisbatan nafrat asosida sodir etilganini ta’kidlab, Rossiyaning Dushanbedagi elchisini vazirlikka chaqirtirdi.
O‘tkir Yusupov yana eski jamoasiga qaytdi
O‘zbekiston milliy terma jamoasi darvozaboni O‘tkir Yusupov o‘zining oldin to‘p surgan «lochinlar» jamoasi – «Navbahor» futbol klubi bilan shartnoma imzoladi. Bu haqda klub matbuot xizmati xabar berdi.
Bayram arafasida Toshkent–Xiva yo‘nalishida qo‘shimcha poyezd qatnovi yo‘lga qo‘yiladi
Bayram oldi va bayram kunlari yo‘lovchilarga qulaylik yaratish maqsadida 156/155-sonli Toshkent – Xiva – Toshkent yo‘nalishida qo‘shimcha poyezd qatnovlari tashkil etiladi. Bu haqda «O‘ztemiryo‘lyo‘lovchi» AJ xabar berdi.
