Tarmoqlarda Xiaomi 17 Ultra flagman smartfonining ilk suratlari paydo bo‘ldi. Qurilma zamonaviy dizayni, ilg‘or kamera va katta batareyasi bilan ajralib turadi, deya yozmoqda Gizmochina.
Telefonning orqa panelida markazda katta dumaloq kamera moduli joylashgan bo‘lib, uning o‘rtasida Leica logotipi mavjud. Yuqori qismida ikki simmetrik flesh joylashgan. Qurilma dizayni Xiaomi 15 Ultra va boshqa Ultra klassi telefonlarga o‘xshash.
Xiaomi 17 Ultra uchta orqa kameraga ega. Asosiy sensor OmniVision OV50X bo‘lib, u 1 dyuymli va LOFIC uchinchi avlod texnologiyasiga ega, bu past yorug‘lik sharoitida tasvir sifatini oshirishga mo‘ljallangan.
Bundan tashqari, 200 megapikselli Leica modul o‘rnatilgan bo‘lib, u Xiaomi 15 Ultra’dagi moduldan 35 foiz kattaroq va Leica APO sertifikatiga ega, bu xromatik aberratsiyalarni kamaytiradi va aniqlikni yaxshilaydi. Orqa kameralar bilan birga 50 megapikselli keng burchakli modul ham mavjud. Selfi uchun 50 megapikselli old kamera o‘rnatilgan.
Xiaomi 17 Ultra tekis 6,8 dyuymli 2K LTPO displey bilan ta’minlangan. Ichida Snapdragon 8 Elite Gen 5 tizimi, 16 GB gacha LPDDR5x operativ xotira va 1 TB gacha UFS 4.1 flesh xotira mavjud. Qurilma 6800 mA·soat sig‘imli batareya bilan jihozlangan bo‘lib, 100 Vt quvvatli simli va simsiz zaryadlashni qo‘llab-quvvatlaydi.
Eslatib o‘tamiz, avvalroq Poco yangi M8 va M8 Pro modellarini taqdim etgani haqida xabar berilgan edi.
