Saudiya Arabistonining Ar-Riyod shahrida bo‘lib o‘tgan Italiya Superkubogi finalida «Napoli» «Bolonya» ustidan ishonchli g‘alaba qozondi. David Neresning gollari amaldagi A Seriya chempionlariga o‘z tarixidagi uchinchi Superkubokni taqdim etdi.
Uchrashuvning 39-daqiqasida Neres hisobni ochdi. Uning uzoq masofadan chap oyoqda yo‘llagan aylanma zarbasini «Bolonya» darvozaboni Federiko Ravalya qaytara olmadi. Ikkinchi gol o‘yinning bir soati ortda qolayotgan pallada kiritildi.
Ravalya to‘pni o‘yinga kiritishda xatoga yo‘l qo‘yib, noaniq pas berdi. Neres himoyachi Jon Lukumidan to‘pni olib qo‘ydi va uni darvozabon ustidan oshirib, darvozaga joylab qo‘ydi. Bu David Neresning 2024-yil avgust oyida «Benfika»dan «Napoli»ga o‘tganidan beri qayd etgan ikkinchi dubli bo‘ldi. U turnirni jami uchta gol bilan yakunladi.
«Biz bu yerga Italiya chempionlari sifatida keldik va ajoyib o‘yin ko‘rsatib, ushbu sovrinni qo‘lga kiritishni istaganimizni isbotladik», – dedi jamoa hujumchisi Matteo Politano.
Antonio Konte boshchiligidagi «Napoli» so‘nggi to‘qqizta rasmiy o‘yinning yettitasida g‘alaba qozondi. Jamoa ayni damda A Seriyada peshqadam «Inter»dan ikki ochko, «Milan»dan esa bir ochko ortda qolib, uchinchi o‘rinda bormoqda.
Avvalroq Kursiv Uzbekistan Skot Maktominay A seriyaning eng yaxshi futbolchisi deb topilgani haqida xabar bergan edi.
