AQSh dollari 2025-yilda jahon bozorida sezilarli darajada o‘z pozitsiyasini yo‘qotdi. Bloomberg’ning tahlillariga ko‘ra, joriy yil yakunlari Amerika valyutasi uchun 2017-yildan buyon eng omadsiz natijani qayd etishi kutilmoqda.
Yil boshidan buyon dollar dunyoning asosiy valyutalariga nisbatan keskin qadrsizlandi. Bloomberg dollar Spot indeksi ma’lumotlariga qaraganda, pasayish qariyb 8 foizni tashkil etgan. 23-dekabr sanasida indeks oktabr oyi boshidan beri kuzatilgan eng past darajaga tushib ketdi.
Garchi vaqti-vaqti bilan qisqa muddatli tiklanishlar kuzatilgan bo‘lsa-da, umumiy tendensiya pastlash tomonga yo‘nalganligicha qolmoqda.
Qiziqarlisi shundaki, AQSh iqtisodiyotidagi ijobiy ko‘rsatkichlar ham valyutani qutqarib qola olmadi. 23-dekabr kuni e’lon qilingan hisobotda Amerika iqtisodiyoti uchinchi chorakda 4,3 foizga o‘sgani ma’lum qilindi. Bu xabar dollarga bo‘lgan bosimni biroz yumshatgan bo‘lsa-da, bozordagi umumiy kayfiyatni o‘zgartirishga va zaiflikni bartaraf etishga yetarli bo‘lmadi.
Opsionlar bozoridagi vaziyat ham dollarga nisbatan bosim davom etishini ko‘rsatmoqda. Treyderlar hozirda yevro va Avstraliya dollarini afzal ko‘rib, AQSh valyutasiga qarshi pozitsiyalarni faol egallamoqdalar. Bu investorlarning dollarga bo‘lgan ishonchi susayganidan dalolat beradi.
Tahlilchilar dollarning qadrsizlanishiga quyidagi asosiy omillar sabab bo‘layotganini ta’kidlashmoqda:
- FRS siyosati: AQSh Federal rezerv tizimi (FRS) tomonidan foiz stavkalarining yana pasaytirilishi haqidagi kutilmalar;
- Mavsumiy omil: Dekabr oyi an’anaviy ravishda dollar uchun zaiflashuv davri hisoblanadi.
Ekspertlar 2026-yilda ham dollar uchun qiyinchiliklar saqlanib qolishini istisno qilmayaptilar. Ularning fikricha, vaziyat faqat AQSh iqtisodiyotida keskin tezlashuv kuzatilsa yoki pul-kredit siyosati qat’iylashtirilgan taqdirdagina dollar foydasiga o‘zgarishi mumkin.
Avvalroq Kursiv Uzbekistan dollar kursi bir haftada qanchaga pasaygani haqida yozgandi.
