General Motors modellari uchun yangi yoritish tizimini tayyorlamoqda

General Motors (GM) o‘z avtomobillarining interyerini yanada jozibador qilish maqsadida yangi texnologiya ustida ishlamoqda. Bu haqda Tarantas News nashri xabar berdi.

General Motors salon ichidagi fon yoritgichlari tizimlari uchun mo‘ljallangan Radiance Lighting savdo belgisini ro‘yxatdan o‘tkazish jarayonini boshladi. Tegishli hujjatlar 2025-yilning 17-dekabr kuni AQSh Patent va savdo belgilari byurosiga (USPTO) yuborilgan bo‘lib, ayni paytda ko‘rib chiqish bosqichida turibdi.

Tizim nimalarga qodir

Tavsifga ko‘ra, Radiance Lighting – bu avtomobil ichki muhitidagi atmosfera yoritgichlari hamda displeylar yorqinligini boshqaruvchi elektron tizim. Hozircha ushbu texnologiya birinchi bo‘lib aynan qaysi modellarda qo‘llanilishi rasman e’lon qilinmagan.

GM so‘nggi yillarda interyer yoritish yo‘nalishini faol rivojlantirmoqda. Xususan, yangilangan 2025-yilgi Cadillac modellarida salon yoritish imkoniyatlari sezilarli darajada kengaytirildi. Masalan, Cadillac Escalade, CT5, Optiq va elektrli Escalade IQ modellarida haydovchilar 126 tagacha rang variantlarini tanlash imkoniyatiga ega, bu esa avvalgi versiyalarga qaraganda ancha ko‘pdir.

Yoritish tizimidan tashqari, kompaniya ekranlar va raqamli kokpitlar bilan bog‘liq bo‘lgan Horizon Display savdo belgisi uchun ham ariza topshirgan.

Ushbu qadamlar GMning 2028-yilga mo‘ljallangan yangi markazlashgan hisoblash platformasiga o‘tish strategiyasiga to‘liq mos keladi.

Avvalroq Kursiv Uzbekistan GM Chevrolet Express Max EV elektr furgonini taqdim etgani haqida yozgandi.