Chevrolet Cobalt modellarining bir-biridan farqi qanday

Cobalt O‘zbekistonda eng ommabop sedanlardan biri bo‘lib qolmoqda. Model UzAuto Motors tomonidan mahalliy bozorda ishlab chiqariladi. Cobalt’ning barcha komplektatsiyalari xaridorlar orasida eng ko‘p qiziqish uyg‘otmoqda. Ular bir xil texnik bazaga ega bo‘lsa-da, jihozlanishi, dizayni va narxi bilan farqlanadi. Quyidagi maqolada Chevrolet Cobalt modellarining bir-biridan farqi taqqoslab beriladi.

GX-Midnight AT

Ushbu komplektatsiya dizaynga katta e’tibor qaratadigan xaridorlar uchun mo‘ljallangan. Qoraytirilgan orqa oynalar, jilosiz kulrang faralar va ruldagi mos bezaklar avtomobilga sportiv ko‘rinish beradi. Model avtomat uzatish qutisi, havo konditsioneri, ABS, old anti-tuman chiroqlari hamda ISOFIX tizimi bilan jihozlangan. Muhim jihati shundaki, dvigatel LPG gaz uskunasini o‘rnatishga tayyor.

Kamchiligi sifatida narxini qayd etish mumkin. GX-Midnight AT GX oilasidagi eng qimmat variant hisoblanadi. Rasmiy komplektatsiyada Bluetooth’li multimedia tizimi ko‘rsatilmagan.

GX-Optima AT Plus

Bu versiya narx va qulaylik o‘rtasidagi muvozanatni taklif qiladi. GX-Midnight’ga nisbatan arzonroq bo‘lib, kundalik hayot uchun zarur bo‘lgan deyarli barcha funksiyalarni o‘z ichiga oladi. Avtomobilda avtomat uzatish qutisi, havo konditsioneri, ABS, old anti-tuman chiroqlari va ISOFIX mavjud. Asosiy ustunligi — Bluetooth’li magnitola va USB portning borligi.
Biroq GX-Optima AT Plus’da qoraytirilgan oynalar va gaz uskunasiga tayyorgarlik yo‘q. Dizayn jihatidan u soddaroq.

GX-Style AT Plus

GX-Style AT Plus iqtisodiy yechimni izlaydigan xaridorlar uchun mo‘ljallangan. Model shtamplangan po‘lat disklar bilan jihozlangan bo‘lib, ular chidamliligi bilan ajralib turadi. Eng muhim afzalligi — dvigatelning LPG gaz uskunasiga tayyorligi. Jihozlar ro‘yxatiga avtomat uzatish qutisi, havo konditsioneri, ABS, ISOFIX va dvigatel karterini himoyalovchi qopqoq kiradi.
Shu bilan birga, GX-Style’da dizayn elementlari kamroq. Bluetooth’li multimedia tizimi rasmiy ro‘yxatda qayd etilmagan.

Cobalt Style MCM

Style MCM komplektatsiyasi amaliy va iqtisodiy yechim sifatida taklif etiladi. Ushbu variantda rangli, masofadan boshqariladigan va elektron sozlanadigan tashqi yon ko‘zgular mavjud. Kunduzgi harakat xavfsizligini oshirish maqsadida old yoritish tizimi uchun maxsus konnektor o‘rnatilgan. Avtomobilda USB port mavjud bo‘lib, mobil qurilmalarni ulash imkonini beradi.

Salonda kulrang bezakli rul chambaragi joylashtirilgan. Havo sovutgichi avtomobil ichida qulay mikroiqlimni ta’minlaydi. Old anti-tuman chiroqlari yomon ob-havo sharoitida ko‘rish imkonini yaxshilaydi. Ushbu komplektatsiyada dvigatel LPG gaz ballon uskunasini o‘rnatishga moslashtirilgan. Qoraytirilgan orqa old oyna va orqa yon eshik oynalaridagi tonirovka avtomobilga yanada jozibali ko‘rinish beradi. Kruiz nazorati esa uzoq masofali safarlarda qulaylik yaratadi. Eksteryerda qora yaltiroq Black Piano rangdagi dekorativ elementlar qo‘llanilgan.

Midnight MCM

Midnight MCM esa yanada boyroq jihozlanishi va uslubiy yechimlari bilan ajralib turadi. Ushbu versiyada ko‘p funksiyali rul o‘rnatilgan bo‘lib, unda kruiz nazorati va boshqa boshqaruv elementlari joylashgan. Rangli va elektr sozlanadigan yon ko‘zgular saqlanib qolgan. Bolalar o‘rindiqlarini mahkamlash uchun xavfsizlik nuqtalari mavjud.

Midnight MCM’ning asosiy farqli jihatlaridan biri — jilosiz kulrang rangga bo‘yalgan faralar bo‘lib, ular avtomobilga sportiv ko‘rinish bag‘ishlaydi. Old o‘rindiqlar isitish funksiyasiga ega. Salonda kulrang bezakli rul chambaragi va teri qoplamali o‘rindiqlar qo‘llangan. Ushbu versiya shtamplangan disklar bilan jihozlangan.

Avtomobilda USB port, qulfga qarshi tormoz tizimi, qoraytirilgan orqa old oyna va kruiz nazorati mavjud. Jihozlanish darajasi yuqoriligi Midnight MCM’ni qulaylik va tashqi ko‘rinishga e’tibor beradigan xaridorlar uchun mos tanlovga aylantiradi.

Jadval:

Eslatib o‘tamiz, Kursiv Uzbekistan nashri Cobalt avtomobilini sotib olish uchun 5 asosiy sababni yozgan edi.