Oppo kompaniyasi global bozorda yangi Oppo Reno 15 Pro Max va Oppo Reno 15 Pro smartfonlarini taqdim etdi. Bu haqda Gizmochina nashri ma’lum qildi.
Yangi modellarda 120 Gts chastotali AMOLED-displeylar, IP68/IP69 himoyasi va Android 16 asosida ishlovchi ColorOS 16 operatsion tizimi mavjud. Katta model 6,78 dyuymli ekran bilan jihozlangan bo‘lsa, Reno 15 Pro 6,32 dyuymli Full HD+ displeyga ega.
Ikkala smartfon ham MediaTek Dimensity 8450 yadro tizimi asosida ishlaydi va 12 GB LPDDR5x operativ xotira bilan ta’minlangan. Reno 15 Pro Max konfiguratsiyasi 12 GB RAM va 512 GB UFS 3.1 xotira bilan, Reno 15 Pro esa 256 GB flash-xotira bilan sotuvga chiqarilgan.
Smartfonlarda 200 MP asosiy sensorli optik stabilizatsiyaga ega uch kamerali modul, 3,5 baravar optik zum bilan 50 MP periskop kamera va 50 MP ultra keng burchakli kamera mavjud. Old kamera ham 50 MP va autofokusli.
Avtonomiya uchun Pro Max versiyasida 6500 mAh batareya mavjud bo‘lib, 80 Vt simli va 50 Vt simsiz zaryadlashni qo‘llab-quvvatlaydi. Reno 15 Pro esa 6200 mAh batareya bilan jihozlangan va 80 Vt tez simli zaryadlash imkoniyatiga ega.
Tayvanda Reno 15 Pro Max taxminan $800, Reno 15 Pro esa $670 atrofida baholangan. Yaqin kelajakda ularning sotuvlari boshqa bozorlarga ham kengaytirilishi kutilmoqda.
Eslatib o‘tamiz, avvalroq Oppo K15 Turbo modelining texnik xususiyatlari haqida yozgan edik.
