Markaziy Osiyo hamdo‘stligi, Burj Xalifaning ochilishi va Marsga ilk qo‘nish — kun tarixi
4-yanvar sanasi mintaqaviy integratsiya, koinotni zabt etish va arxitektura mo‘jizalarining yaratilishi bilan tarixda qolgan. Kursiv Uzbekistan kunning eng muhim voqealarini xronologik tartibda taqdim etadi.
1785-yilda nemis filologi va folklorshunosi Yakob Grimm tavallud topdi. U ukasi Vilgelm bilan birgalikda nemis xalq og‘zaki ijodini to‘plab, «Zolushka», «Oppog‘oy», «Bremen sozandalari» kabi dunyoga mashhur ertaklarni kitob holiga keltirgan. Shuningdek, Yakob Grimm german tillari tarixi va grammatikasini chuqur o‘rganib, tilshunoslik faniga katta hissa qo‘shgan.
1936-yili AQShda musiqa sanoatining eng nufuzli nashrlaridan biri bo‘lgan «Billboard» jurnali o‘zining ilk hit-paradini e’lon qildi. Dastlabki reytinglar plastinkalar savdosi asosida tuzilgan bo‘lib, bu voqea shou-biznesda raqobat va ommaviylikni aniqlashning yangi xalqaro standartini belgilab berdi.
1948-yilda Janubi-Sharqiy Osiyodagi davlat – Birma (hozirgi Myanma) rasman Buyuk Britaniya mustamlakasidan ozod bo‘lib, o‘z mustaqilligini e’lon qildi. Mustaqillikning dastlabki yillarida mamlakatda parlament demokratiyasi o‘rnatilgan bo‘lsa-da, keyinchalik davlat uzoq yillar davomida harbiy rejimlar boshqaruvida qoldi.
1951-yili o‘zbek dramaturgiyasining zabardast vakili Sharof Boshbekov Samarqand viloyatida tug‘ildi. Uning qalamiga mansub «Temir xotin» komediyasi hamda «Charxpalak» teleseriali o‘zbek xalqining maishiy hayoti, dardi va quvonchini samimiy yoritib bergani bilan tomoshabinlar qalbidan chuqur joy olgan.
1960-yilda adabiyot bo‘yicha Nobel mukofoti laureati, fransuz yozuvchisi va faylasufi Albert Kamyu avtohalokat tufayli hayotdan ko‘z yumdi. «Begona» va «Vabo» asarlari orqali ekzistensializm falsafasini yoritgan adib, inson hayotining ma’nosi va absurdlik tushunchalarini chuqur tahlil qilgan holda XX asr G‘arb adabiyotiga kuchli ta’sir o‘tkazdi.
1993-yili Toshkent shahrida O‘zbekiston, Qozog‘iston, Qirg‘iziston, Turkmaniston va Tojikiston rahbarlarining tarixiy uchrashuvi bo‘lib o‘tdi. Unda mintaqa davlatlari o‘rtasida iqtisodiy va siyosiy hamkorlikni kuchaytirish maqsadida «Markaziy Osiyo Hamdo‘stligi»ni tuzish to‘g‘risida muhim qaror qabul qilindi.
2004-yilda NASA’ning «Spirit» kosmik apparati Mars yuzasidagi Gusev krateriga muvaffaqiyatli qo‘ndi. Aslida 90 kunga mo‘ljallangan missiya bir necha yil davom etdi va Qizil sayyorada qadimda suv bo‘lganligini isbotlovchi noyob geologik namunalarni hamda fotosuratlarni Yerga uzatildi.
2010-yili Dubayda insoniyat me’morchiligining cho‘qqisi hisoblangan Burj Xalifa binosining tantanali ochilish marosimi o‘tkazildi. Balandligi 828 metr va 163 qavatdan iborat ushbu inshoot nafaqat ofis va mehmonxonalarni, balki dunyodagi eng balandda joylashgan kuzatuv maydonchasini ham o‘z ichiga oladi.
Avvalroq Kursiv Uzbekistan 3-yanvar sanasida sodir bo‘lgan muhim hodisalar haqida xabar bergan edi.
