iQOO kompaniyasi yaqin kunlarda taqdim etilishi kutilayotgan iQOO Z11 Turbo smartfoni bo‘yicha dastlabki texnik tafsilotlarni e’lon qildi. Bu haqda kompaniya rasmiy sahifasida ma’lum qildi.
Rasmiy taqdimot yanvar oyiga rejalashtirilgan bo‘lsa-da, qurilmaning xususiyatlari allaqachon ma’lum bo‘ldi.
Brend bergan ma’lumotlarga ko‘ra, iQOO Z11 Turbo AnTuTu testida 3,6 mln ball to‘plagan. Bu ko‘rsatkich Snapdragon 8 Gen 5 platformasidagi OnePlus Ace 6T natijasidan biroz yuqori. Ballar taqsimoti ham ochiqlangan: protsessor – 1 057 948, grafik tezlatkich – 1 157 399, xotira – 572 070, interfeys va tizim optimizatsiyasi – 811 621 ball.
Smartfon 6,59 dyuymli LTPS OLED displey bilan jihozlanishi kutilmoqda. Ekran 1,5K aniqlik va 144 Gts yangilanish chastotasini qo‘llab-quvvatlaydi. Qurilma 16 GB LPDDR5x tezkor xotira va 512 GB UFS 4.1 doimiy xotira konfiguratsiyasigacha taqdim etiladi.
iQOO Z11 Turbo’ning eng katta ustunliklaridan biri – 7600 mA·soatli akkumulyator bo‘lishi aytilmoqda. Kamera qismida esa 32 megapikselli old kamera hamda Samsung HP5 sensori asosidagi 200 megapikselli asosiy kamera (optik stabilizatsiya – OIS bilan) joy oladi. Qo‘shimcha modul 8 megapikselni tashkil etadi.
Smartfon Android 16 va OriginOS 6 tizimida ishlaydi. Shuningdek, ekran ostiga o‘rnatilgan ultratovushli barmoq izi skaneri, metall ramka, shisha orqa panel hamda IP68/IP69 standartlari bo‘yicha suv va changdan himoya bilan ta’minlanadi.
Avvalroq Kursiv Uzbekistan iQOO Z11 Turbo flagman darajadagi xususiyatlar bilan chiqishi kutilayotgani haqida yozgandi.
