Kiyev Putin qarorgohiga qilingan hujumga O‘zbekistonning munosabatini tanqid qildi
Ukraina Tashqi ishlar vazirligi Rossiya prezidenti Vladimir Putinning qarorgohiga qilingan hujum haqidagi xabarlarga O‘zbekiston, Qozog‘iston, Qirg‘iziston, Turkmaniston va Tojikiston rasmiylarining munosabatini tanqid qildi.
«Biz ushbu besh davlatning Putinning qarorgohiga hujum haqidagi tasdiqlanmagan soxta yangiliklarga munosabatini ko‘rib hayron bo‘ldik», – dedi Ukraina Tashqi ishlar vazirligi vakili Georgiy Tixiy.
Uning so‘zlariga ko‘ra, bunday bayonotlar ushbu davlatlarning Ukraina suvereniteti va hududiy yaxlitligini qo‘llab-quvvatlash bo‘yicha ilgari e’lon qilingan pozitsiyasiga zid keladi. Uning ta’kidlashicha, «Rossiya soxtalari»ga munosabat Ukraina o‘zaro hurmat va manfaatlarga asoslangan do‘stona hamda pragmatik munosabatlarni rivojlantirishga intilayotgan mamlakatlar uchun to‘g‘ri ish emas.
Ukraina Tashqi ishlar vazirligi, shuningdek, Markaziy Osiyo mamlakatlarining bayonotlari, ayniqsa, Rossiyaning Ukrainadagi tinch aholi nishonlariga qilingan haqiqiy zarbalariga rasmiy javob berilmagan paytda bildirilgani kutilmagan holat ekanini aytgan.
«Hozirda davlat obyektlariga hujumlar haqida munosabat bildirayotgan bu mamlakatlar 2025-yil 7-sentabr kuni Rossiya raketasi Ukraina Vazirlar Mahkamasiga zarba berganida hech qanday reaksiya bildirmadi», – dedi Tixiy.
Rossiya Tashqi ishlar vazirligi 29-dekabr kechasi Ukraina go‘yoki 91 ta dron yuborib, Valday mintaqasiga hujum qilishga uringanini da’vo qildi. Ukraina prezidenti Vladimir Zelenskiy bu da’volarni yolg‘on deya rad etdi va Moskva muzokaralar jarayonini buzishga hamda Kiyevdagi hukumat binolariga mumkin bo‘lgan hujum uchun zamin yaratishga urinayotganini da’vo qildi.
Avvalroq «Kursiv» Shavkat Mirziyoyev Vladimir Putin qarorgohiga uyushtirilgan hujumni qoralagani haqida yozgandi.
