Yevropada klassik «Jiguli»ning noyob nusxasi sotuvga chiqarildi. Speedme nashriga ko‘ra, gap 1981-yilda ishlab chiqarilgan VAZ-2101 haqida ketmoqda. Avtomobil uchun 3,2 ming yevro ($3,7 ming) so‘ralmoqda.
Mashina Germaniyaning Frankfurt-na-Oder shahrida topilgan. Sotuvchining aytishicha, avtomobil umrining katta qismini garajda o‘tkazgan va deyarli foydalanilmagan. Uning yurish masofasi atigi 4,8 ming kilometrni tashkil etadi. Suratlarda kuzov qizil rangda ekani, zang izlari yo‘qligi va avtomobil to‘liq soz holatda ekani ko‘rinadi.
VAZ-2101 65 ot kuchiga ega benzin dvigateli va mexanik uzatmalar qutisi bilan jihozlangan. Moy va generator almashtirilgan, korroziyaga qarshi ishlov berilgan. Texnik ko‘rik 2026-yil sentabrigacha amal qiladi.
Asosiy jihat shundaki, mashina xususiy shaxs tomonidan sotilmoqda. Hech qanday kafolat yoki qaytarish imkoniyati yo‘q. Bundan tashqari, avtomobil Rossiya hududidan tashqarida joylashgan. Shu sababli xaridor transport, bojxona va ro‘yxatdan o‘tkazish bilan bog‘liq qo‘shimcha xarajatlarni ham hisobga olishi kerak bo‘ladi.
Shunga qaramay, narx ko‘pchilik uchun arzon ko‘rinadi. Rossiyada yaxshi saqlangan, kam yurgan VAZ-2101 modellarining bahosi ancha yuqori. Shu bois Germaniyadagi bu model kolleksionerlar uchun qiziqarli taklif bo‘lishi mumkin.
Eslatib o‘tamiz, avvalroq 37 yil garajda saqlangan Chevrolet Camaro superkar narxida sotuvga qo‘yilgani haqida xabar berilgandi. Sotuvchi avtomobilni $92,5 mingga baholagan. Bu summa hatto yangi Chevrolet Camaro ZL1 1LE narxidan ham yuqori.
