2025-yil yakunlariga ko‘ra, o‘zbekistonlik grossmeysterlar Nodirbek Abdusattorov va Javohir Sindarov dunyoning eng ko‘p mukofot puli ishlagan shaxmatchilari kuchli o‘nligidan joy oldi. Bu haqda Chess.com xabar bermoqda.
Ikkala shaxmatchi ham yil davomida yirik xalqaro turnirlarda muvaffaqiyatli ishtirok etib, umumiy hisobda $100 minglik dovonni bosib o‘tgan 26 nafar shaxmatchi qatoriga kirdi. Nodirbek Abdusattorov 2025-yil davomida 16 ta turnirda qatnashib, jami $362 ming ishlab topdi va reytingning 9-pog‘onasini band qildi. Uning eng yirik yutug‘i $85 mingni tashkil etdi.
Ro‘yxatning 10-o‘rnidan esa Javohir Sindarov joy oldi. U 11 ta turnirda ishtirok etib, jami $350 ming daromad ko‘rdi. Sindarovning eng katta muvaffaqiyati 2025-yilgi FIDE Jahon kubogidagi g‘alabasi bo‘lib, bu unga $120 ming keltirdi.
Reytingni norvegiyalik Magnus Karlsen boshqarib turibdi. U o‘tgan yili turnirlarda qariyb $1,5 mln ishlagan yagona shaxmatchi bo‘ldi. Kuchli uchlikdan AQSh vakili Fabiano Karuana ($889 ming) va Levon Aronyan ($752 ming) o‘rin olgan.
Avvalroq Kursiv Uzbekistan Javohir Sindarov FIDE reytingida 3 pog‘ona ko‘tarilgani haqida xabar bergan edi.
